邊度嘅牛腩最出名？問10個街坊，差不多有10個都會答去電氣道食華姐清湯腩。原來天后電氣道食腩的確好出名，幾乎每間餐廳都有牛腩賣，清湯腩、咖喱腩、鮮茄腩、蘿蔔燜腩等，總之講得出的煮法都有食得。今日搵埋亞視藝員周子豪同董南菲試勻幾款，睇吓清湯腩定係咖喱腩好食啲呢！
記者：梁學文 攝影：伍慶泉
Model：Ruby、Hidy、William
華姐清湯腩解紋理肉夠腍
在街頭做個簡單的訪問，問天后牛腩邊間最好味？幾乎個個都話係華姐清湯腩，一來鍾意華姐的清湯，二來愛喺嗰度食出人情味。咦！難道華姐就是天后的「天后」？華姐的清湯腩湯清腩滑，對客人一句又一句關心的說話，令客人食得開心。華姐清湯腩之所以出名又好味，全靠了解牛的不同部份。
華姐每朝6點就會起身煲湯燜腩，清湯起碼要煲4個鐘至出味，而燜腩秘訣就在於大火煲滾再細火燜，牛腩就夠晒腍。華姐話其清湯腩無特別指定要坑腩、硼砂腩或肥腩，因為每部份都是好腩，同樣可以燜得好。牛腩腍唔腍除了火候，最重要是刀工，華姐話了解牛腩的紋理，不過冇話實係順紋切或者橫紋斬，總之每隻牛都不同，點燜都會腍。至於牛的哪個部份最好食？愛食牛的華姐就推介牛肩膊，因為牛肩膊少油多肉，加上膊頭位經常伸展，肉質較有彈性。
淨清湯腩$30
有多個部份可以揀，半肥瘦、全肥或者唔肥都有。最好味是全肥腩，入口腍滑，有好多牛脂肪，不過牛味十足。清湯夠清澈，味道夠甜，食法最好一啖牛一啖湯。
菜肉雲吞$18
菜肉雲吞有多款肉餡可以揀，且即叫即包，保證新鮮。
酒味醉雞$35
不說不知，原來華姐賣腩之前是賣上海菜，所以這裏的上海菜一樣受歡迎，尤其是醉雞，酒味好夠，雞肉入味。
街坊評分
個湯底夠清，牛腩夠腍，屬天后牛腩之冠。
華姐清湯腩（28070181）
地址：天后電氣道13A地下
營業時間：11am-10pm
座位：約40個
中印合璧燜牛腩
唔食清湯腩，行前半條電氣道就有阿郭咖喱，可以食咖喱牛腩。他們的咖喱牛腩是餐廳的BestSeller，做法混合了中印煮法，師傅Raymond說：「以前試過淨係用印度式煮法，啲牛太重咖喱味，肉質好鬼韌，所以𠵱家用中式方法燜牛腩，再加咖喱汁煮。」
阿郭咖喱主要用坑腩，Raymond話最緊要挑走層衣。其實坑腩同排骨一樣，有層薄薄的衣在肉面，只要挑走，燜好後肉質就會變腍，不過挑衣工夫都幾煩，不過食落唔會好韌又黐牙。
咖喱牛腩$56
用上8種在印度入口的咖喱香料做成，咖喱味夠重。入口還有一陣番茄味，皆因煮咖喱時先用番茄做汁底，開胃又中和咖喱的辣味。牛腩切到四四方方，紋理清晰，咬落確實腍滑。
燒烤精選$138
有雞羊同海鮮，味道帶酸辣。煮前先用乳酪和香料醃4個鐘，然後放入爐燒熟。雖然香口，不過略嫌有點亁身。
街坊評分
咖喱味夠香夠濃，鍾意半肥瘦坑腩者必到。
阿郭咖喱（25080122）
地址：天后電氣道88號地下
營業時間：12nn-3pm、6pm-11pm
座位：約40個
超級肥腩煲
日賣50斤牛腩
釗記專用胃下腹腩做牛腩，大廚兼老闆李生話因為胃下腹腩味道最好，雖然有點肥，不過就夠晒滑，入口有即溶的感覺，食落仲有點似食肥牛。釗記的牛腩好味之處，是加入了金銀花和菊花等藥材成份，中和了牛肉本身的燥熱感覺，李生說：「我以前都有用坑腩做，不過效果都唔及用胃下腹腩好，最緊要係胃下腹腩夠肥夠味，口感好好。我哋加入藥材一齊煮，令牛腩味道更突出之外，亦可以中和牛腩本身嘅燥熱，食完無咁熱氣。」
釗記做牛腩做了十幾年，幾年前仲在書局街開了間專賣牛腩的B記，老店釗記實力當然也不弱，試過3日賣出150斤牛腩，平均每日50斤，認真厲害。
蘿蔔肥腩煲套餐$42
用胃下腹腩做牛腩煲，牛味夠濃，入口有點似肥牛，不過牛肉味更重且有𡁻口。除了口感好外，牛腩煲的醬汁亦特別，有些少藥材味，配合牛肉本身的味道又確實與別不同。可惜肥腩幾肥膩，不可吃太多！
南乳炸雞套餐$38
南乳炸雞南乳味好重，鹹鹹脆脆送酒一流。炸雞用雞扒肉做，夠滑亦有雞味。
街坊評分
唔怕肥膏又愛有𡁻口嘅話必試！
釗記（28073156）
地址：北角電氣道74號
營業時間：8am-11pm
座位：40個
認識常用小牛腩
1.坑腩
屬半肥瘦類別，連筋連肉，用來燜或燉都好味。不過肉質比較「嚡」口，好易燜得過火或者唔夠腍。
2.崩砂腩
崩砂腩入口比較實，肉質屬重口感型，有𡁻口，不過好易咬崩牙，老人家或者牙力較弱的朋友，食的時候要小心。
3.胃腩
胃腩因為近肚腩位置，囤積大量脂肪，呂氏春秋都有講過：「肥肉厚酒，穿腸毒物。」膽固醇過高或高血壓人士，少吃為妙。雖然胃腩肥，但是好好味，少吃多滋味。
街坊有意見
William
最好味係咖喱腩，係我至愛，我揀阿郭咖喱。
Ruby
我最鍾意華姐嘅清湯，真係好甜。
Hidy
華姐清湯腩嘅腩有好多選擇，半肥瘦最啱我。
Wi
我好鍾意清湯腩，華姐嗰度味道就最啱。
Flora
坑腩最好味，半肥瘦唔係好肥膩。
Jennifer
我最鍾意食肥腩，越肥越好味。
