賓架Ｐ請退休大教授到占美廚房食午飯，好客氣咁搵埋才子Ｔ與左丁山作陪。左丁山當年考新聞系，要過口試一關，把關者就係退休大教授，佢問一條問題，幾乎令左丁山語塞，好彩曾經睇過族譜，知道家族姓氏源流，識得吹牛幾句，先至過到關，呢條問題就係：「嗱，你姓曾或者任或者梁或者黎，點解你姓×？」。但事後左丁山俾屋企鬧，話讀新聞系，學做記者，一定一世捱窮；難頂父母壓力，於是決定唔轉系，留番喺經濟系，但如此一來，又俾新聞系主任省咗一餐懵，話年青人言而無信，浪費一個學額，臨時冇人替補。唉，想唔到後來命運弄人，唔做賓架，轉行做咗傳媒人，卒之都係得個捱字。
大教授唔會記得陳年舊事咯，佢關心嘅係時事，憂慮中國大陸啲公司、大學嘅英文水平，佢話：「堂堂大藥廠，中成藥說明都可以亂嚟，補腎嘅英文，竟譯成mendkidney，直情令我哋唐人冇晒面。佢哋啲老闆食一晚飯，都用成幾千至一萬元人民幣，點解唔願意出錢請啲文字專家搞好啲繙譯呢？」有錢人未必係咁樣諗法，啲藥廠老闆願意晚晚用一、兩萬人民幣去沖涼跳舞揼骨，未必肯一個月出三幾千嚟請一個繙譯好手。
大教授退休後有時間做編輯工夫，發願將一啲當代著名中文作家嘅著作引入香港，有完整性、系統性咁樣出版一個個系列，介紹畀香港讀書人。雖然有熱心出版社響應，點知香港人永遠鍾意買字典、辭典、食經、股壇發達經，或者旅遊指南，但對小說、散文呢類，不論作者名氣，不論文字優雅，總之唔會買。大教授搖頭嘆息話：「出咗兩部書，夾埋大概賣咗一千本咁多。出版商話以後咪制，我都好明白嘅，香港人點解唔睇遠啲，讀多啲好著作呢？」咁深層次嘅問題，唔識答，埋頭食白汁雞皇飯好過。講講吓，才子Ｔ應承接觸一啲富裕人士，睇吓有冇人肯贊助出版，為香港文化出番一分力，贊助費要幾多呀？大教授話幾萬銀都勉強可以嘅。才子Ｔ聽完，喃喃自語：「大富豪做生意炒股，一日賺一億有多噃。」