好現實，每當失戀，人才會想起《朋友二號》。但小記無失戀，此曲旋律卻縈繞腦中幾天不散！全因知道要訪問今日主角鄧健泓（Patrick），整天準備功課、諗定問題關係。無見一排，更覺滋油淡定好多，還以為大男孩終於成熟了，但一講到愛驅MINICooperS，鬼馬本性即場露餡！「CooperS俾人感覺好曳，正好同我Match番晒！爽快操控揸落仲同我好夾，我簡直愛佢愛到要幫佢搵埋老婆！」
文：吳心彥 攝影：譚盈傑
髮型：MichaelLam@HairCulture
老實講，勁寸、勁Cool，絕對係小記對鄧健泓喺電視上嘅印象，不過經過半日訪問，完全改觀！反而令小記感受到一份友善、真性情，𠵱家娛樂圈嘅星級歌手，真係好少見！
約好兩點在沙田等，踏正兩點，手機另一邊即響起Patrick把聲：「到咗啦！」準時得嚇人！Patrick、助手、攝記同記者們一行4人，驅車直往沙田獅子亭，上到山頭，攝記傑哥望望景色，一句No！我們又要再另覓地方，經Patrick助手強烈推介，最終選了沙田一隱蔽小山丘拍攝。
大男孩
夠風度
Patrick充當司機到拍攝目的地，小記經常性指錯路，但Patrick一句「得，無問題！」，有耐性之餘揸車仲非常小心，「興奮時可能會揸快啲，但一定唔會超速，有乘客時會更為小心！」最令小記深刻，係每次上、落車，Patrick都會搶先落車，幫我哋拉低前排座位（因為CooperS只得兩門），令我哋上、落車更加方便。
短短幾分鐘上山車程中，路面狹窄兼單線雙程，唔知好彩定無運，竟然迎頭遇到6、7架大貨車落山！Patrick每次都會先倒車，仲打埋手勢，示意對方先行，遇着對方先讓路，又會做手勢多謝對方。嘩！原來𠵱家仲有咁好風度嘅司機，「我覺得禮貌好重要，只要做多一個手勢，大家都會舒服好多！」
對MINI又愛又恨
一講到MINICooperS各部份，Patrick都係有讚無彈，不過對於呢架車背後嘅意義，Patrick就表現得極之無奈，「呢架車喺04年8月買，從嗰時開始，佢可以講係同我共度咗唔少艱苦時段，所以我一方面好鍾意呢架CooperS，但望見佢又會諗起唔開心嘅日子。」（編按：按時間推斷，艱苦時期應指戀情告急及事業走下坡的日子。）
或者因為同病相憐，Patrick好希望將來可以幫佢呢個囝囝，搵番個好老婆，「我好希望可以供完佢，將來更計劃買多架車陪佢，叫做幫佢搵番個老婆，等佢唔使咁悶嘛！」
至愛Cute車
雖然喺加拿大讀書一Take過考到車牌，不過返到香港都差不多01年先開始有買車嘅念頭，「有次坐過蔡子健架車，覺得有車真係方便，咪買咗HondaHR-V。」不過最令Patrick心動、瘋狂嘅，都係呢架MINICooperS，「喺Showroom入面見到呢架車，外形Cute爆，內櫳又靚，覺得佢同我一樣俾人感覺好活潑好曳，撞啱監製林潤明又話買，於是齊齊出咗車。」
CooperS 愛快者首選
自MINI被德國BMW車廠收歸旗下後，多年來曾推出過不同版本的MINICooper。最吸引的，肯定是配備了Supercharger的1.6公升直4引擎的CooperS，馬力達163匹，6前速手波也令車子有敏捷爽快的加速感。去年，新MINI第二代亦正式登場，引擎雖仍是1.6公升，但卻放棄了Supercharger，改換上Turbocharger，馬力輸出數值暴增至175匹！
MINICooperS規格
引擎：1,598c.c.直4DOHC配Supercharger
馬力：163ps/6,000rpm
扭力：21.4kgm/4,000rpm
傳動：6前速手波
當年新車價：21萬元起
現時二手價：約15萬元起