緋聞可以催旺人氣，更可以增加搵銀機會！緋聞多多的佘詩曼深明此理，她與吳卓羲被傳撻着後昨日首度一同亮相，二人為了保護剛萌芽的戀情更在活動中各據一方，明顯避免再招話柄，事後還異口同聲表示「冇尷尬」，吳卓羲更否認如外間報道般花心，似是要向阿佘派定心丸。
佘詩曼、吳卓羲、廖碧兒和郭晉安昨日為KCP九龍城廣場擔任揭幕嘉賓，四人更在醒獅前打鼓，甚有氣勢。不過醒獅表演遠不及阿佘和吳卓羲這對新鮮滾熱辣的緋聞男女精采，兩人在台上刻意避忌，即使應傳媒邀請合照也只是生疏點頭，互裝不熟。
冇聯絡陳浩民
阿佘和吳卓羲均稱碰面時沒有尷尬，佘詩曼更謂多謝傳媒關心，她說：「希望啲周刊唔好再做媒人，我只可以講真命天子未出現。」有傳她和舊愛陳浩民甩拖後，對方生活變得落泊，阿佘說：「自己最清楚自己生活，總之冇你哋講嘅事，同浩民係朋友，但近期冇刻意聯絡。」
吳卓羲與阿佘傳出緋聞後即湊巧獲安排同場剪綵，還順理成章成為全場焦點，當問薪酬可有因此提升時，吳卓羲說：「之前已經有呢個工作，我好抵用，又廉價。」近日堪輿學家麥玲玲在接受雜誌訪問公開批評吳卓羲花心兼桃花多，他即時澄清為人十分專一，還說：「我睇另一本又唔係咁寫，都唔知邊本先啱，桃花多都好，旺觀眾緣。」
碧兒引死高層
此外，廖碧兒昨日在台上進行打手印儀式時，其豐滿上圍不時蕩漾，難怪冧得身旁外籍高層不斷盯實她，事後她說：「我貼晒膠紙，冇走嚟走去，身邊位外籍人士係留意我頸上條鏈個B字，因為佢個名都有個B字。」
採訪：卓寶花
攝影：陳俊強
