講到冬天最啱食咩肉類，幾乎人人都會話：「食羊啦！夠晒暖身。」不過，大家可能只識食羊腩煲，其實羊嘅不同部位都可以煮出佳餚，真係周身寶，以後就唔使獨沽一味喇！
記者：林佩婷
攝影：譚盈傑
Model：澄澄、Ruby
示範：東來順施超群師傅（27332020）
資料：千草醫藥坊註冊中醫師譚莉英（21211981）
葱爆羊肉
需時：10分鐘（未計醃肉時間）
價錢：$40/2人
材料：羊後腿肉4両、京葱3両（切絲）、味粉/生抽各1/2茶匙、老抽/胡椒粉/鹽/油各少許
做法：羊腿肉切片用鹽/味粉醃30分鐘，拉油備用；以少許油燒熱鑊，細火爆香京葱，依次放羊腿肉/生抽/老抽/胡椒粉，兜炒至熟上碟。
知多啲：羊腿肉即使用來炒，也能保持嫩滑彈牙。
粉皮白切羊肉
需時：2小時（未計冷藏羊肉時間）
價錢：$30/2人
材料：羊前腿肉1斤、粉皮2両、青瓜片少許、味粉1/2茶匙、鹽/熱水少許
醬汁：日本豉油1茶匙、辣油/味粉各1/2茶匙、京葱碎/芫荽碎/麻油各少許
做法：羊肉以中火蒸11/2小時，攤凍包以保鮮紙雪30分鐘，取出切片，鋪排上碟後灑上熱水。粉皮先以味粉/鹽撈勻，放碟中央，青瓜撒上面。吃時蘸醬汁。
知多啲：羊前腿肌肉較多，做冷盤也不怕肥油出現。
啤酒羊腩煲
需時：4小時
價錢：$50/4人
材料：羊腩肉2斤、紅蘿蔔2両（切菱形）、秀珍菇2両、葱少許（切段）、油少許、啤酒1/2罐、水8飯碗、南乳/腐乳各1湯匙、味粉1/2茶匙、鹽少許
做法：秀珍菇及紅蘿蔔先汆水。羊腩斬件後用中火爆香，之後加水中火燜約31/2小時。燜完取出拆骨，羊肉放回煲內，加入秀珍菇/葱/南乳/腐乳，慢慢倒入啤酒，慢火煲15分鐘，落味粉/鹽調味即可。
知多啲：羊腩燜完後更腍，若其他部份則容易變韌，不宜燜。吃時伴以生菜，濃淡配合相得益彰。
孜然羊肉串
需時：1小時
價錢：$20/2人
材料：羊柳肉4両（切粒）、生粉1/2茶匙、麵粉2茶匙、雞蛋1隻、孜然粉適量
醃料：味粉/鹽各1/2茶匙、番茄1個（切碎）、洋葱1/2個（切碎）
做法：羊柳肉以醃料醃1/2小時，加生粉/麵粉/雞蛋撈勻，然後串起烤至熟。若家中沒有烤爐，可用中火滾油後轉慢火炸1分鐘，食時蘸孜然粉。
知多啲：一隻羊只有兩條羊柳，十分矜貴，北方人鍾意燒嚟食，夠晒香口。
丁香草果去羶味
施師傅話，最好選閹過的羊來吃，因為肉嫩唔羶；而羊家族中以產於內蒙西林格勒東烏旗、西烏旗的黑頭白羊最好，該種羊在出生後1年至年半左右就會被閹，換言之剛斷奶就被閹，所以肉質細膩，又沒羶味。
至於一般羊肉，施師傅教路，煮之前將羊肉汆水10分鐘，再落丁香或草果煲至水滾，便能辟去羶味。
感冒傷風咪食
據譚莉英中醫師講，羊肉可以行氣活血，補陽氣，最啱怕凍、易頭痛及虛寒的人食，可以暖身。
不過要留意有感冒傷風、瞓得差、便秘口亁和熱氣的人就不宜食用；尤其是生緊暗瘡，食咗等於火上加油，又痕又痛。
羊肉雖暖身，但也不宜過量食用，以成人來說，最多一次吃6至8件，一星期最多食兩至三次好了，而小朋友則份量減半。
