睇新聞，話香港「光害」嚴重，想抬頭有星睇，難矣！細個睇星仲會去太空館，燈泡加摩打模擬星空，閃閃吓幾吸引。到𠵱家數碼年代，屋企投射流星雨已經係小兒科，想睇星？大埔滘嘅白鷺湖互動中心，入咗套價值約50萬嘅STARLAB（數碼立體星象館），可以輸入真實的星象數據，帶你跳出地球，勁過太空館！
記者︰劉昱蘭
攝影︰楊錦文
Models︰Ada、Charile
數碼STARLAB
勁過太空館
去太空館，多數都係睇天文電影，得番一兩場係睇星星，鬼咩，年紀大機器壞，入面嘅燈泡、摩打不在狀態都好自然嘅，行數碼嘅STARLAB就無呢個問題，12星座、8大行星、仙女座星系等，你想朝早睇、落雨又睇都無問題，STARLAB可以投射喺全天域嘅半球形FullDome入面（可容納50人），喺入面一抬頭，就好似漫天星星扯咗落嚟咁樣，好壯觀。除咗抬頭睇星，仲可以摸擬坐太空船，由飛離地面一刻開始、擦過變成一線一線的宇宙星體、最後見到十萬光年遠的行星，坐喺180度的空間入面跟足全程，好有代入感。
時光倒流查耶穌出世
除咗可以時光倒流，仲可以衝出地球，唔單只返回從前，再去埋世界各地，觀察不同文化的星空。星河科研社主席Savio話，試過輸入Data，計算番耶穌出世係邊一日，因為傳說話，嗰日喺伯利恒西邊有粒好光嘅星，其實係金星同木星近到肉眼分唔開，得出結果係，公元後30年間，只有公元2年6月17日，可以喺當地見到呢個奇景咁話。
即時扮做太空人
既然可以入Data回到過去，想Real-time即時睇吓呢一刻啲太空船，去咗邊睇到乜都無難度，只要太空總署有發放資料上網，駁去STARLAB即時運算，就可以留守地球做太空人。坊間千零蚊嘅星空投影機，都只係睇吓流星；太空館啲燈泡摩打又唔會識計數，邊會好似STARLAB咁巴閉，帶你上天下地又回到過去。
香港首個圓頂天文觀測室
Savio表示，政府天文台做緊嘅其實係氣象，而非天文（觀星），台灣、日本等都叫佢做氣象局（廳）而不叫天文台，叫「天文台」只因中國歷史上把天文、氣象兩者混合，而全港第一個觀星（天文）嘅天文台，就喺79年由香港中文大學建成，到𠵱家有27年歷史！佢有支強力望遠鏡，再加個可移動上蓋保護住支鏡。
DIY整孔明燈
睇飽就玩啲手作仔，教你整三國時代通風報信的孔明燈。孔明燈亂放係違法嘅行為，但我哋今次放嘅係回收式孔明燈，放咗上去扯得返轉頭就無問題，放心許願喇。
孔明燈點整？
Step1
剪好長方形底、三角形頂的紙樣後對摺。然後放在8張對摺好的紙上，依紙樣裁出。
Step2
8張紙攤開後拼貼好，在上面寫上願望。再在捲好圓形的燈底，繫上鐵線，放上棉花或威士及回收繩。
Step3
在爐邊令燈內空氣受熱。在棉花上加火酒，然後點火。
靚女點睇？
睇星食半自助餐
玩咗咁耐，最關心就係個團包咗乜嘢食啦。豐富囉！半自助餐晚餐，沙律、餐湯……統統任食，環境自然Relax，仲有以下3個MainCourse可以任選其一。
威尼斯雞肉菠菜麵
菜味清新，雞肉醬汁夠惹味。
燒美國牛肉眼配黑椒刁草汁
微辣肉扒配上法國香草，香氣獨特。
煎石斑柳配蘆笋蝦仔亁葱汁
呢個Sauce比較清啲，配住鮮味蝦仔，愛口味清淡的最啱食。
報團資料
星河科研社——情迷星星孔明燈
活動︰製作星圖、參觀數碼立體星象館、DIY孔明燈、享用半自助晚餐、天文台觀星及放孔明燈許願
地點︰大埔滘紅林路2號嘉里白鷺湖互動中心
團費︰$168（12歲以下）/$198（12歲或以上）
查詢電話︰81060660
網址︰www.astro.hk
備註︰30人成團，60人可包團，上限為120人。