過咗旺季，成個市呆咗，蟹貨去得衰過舊時，PS3主機同遊戲繼續坐艇，相反，NDS就食住個勢，推出《三國志大戰DS》。
阿肥老闆講，因為版權問題代理拎唔到行版，至於勁吸引嘅全Set紅色限定版，一早就俾人訂晒冇得追單，而佢又一啲都唔平，連運費大約要$900左右，抵唔抵玩真係見仁見智，但呢水賣晒就唔會再返，有心者請自己衡量價錢。
GC舊作又被炒
GameCube走勢勁差，唔少大作好似《Biohazard0》同《薩爾達傳說 風之指揮棒》都劈價劈到飛起，嗰日同老張吹水，收到風《Bio0》入極都俾人搶晒，出面吹話佢會將啲GC舊作翻出Best版，單料原來堅過石堅，如果𠵱家唔想捱貴價買呢批舊貨，不妨等老任正式宣布會出邊幾隻Best版至扑槌畀錢啦。另外，Wii行版依然毫無新料，日版方面亦因貨源不足，標返去$1,900價位左右。
《.hackG.U.》冇人肯返
PS2臨近尾聲，代理冇興趣入行版，水貨都少得可憐。好似《.hackG.U.》三部曲，冇行貨搞到勁難買到，而《幽遊白書》同《ShiningForceEXA》嘅情況亦差唔多，咁搞法老翻點會死吖。PS3嘅情況亦唔好得幾多，好多日本舖頭已經瘋狂掟貨，唔單只係20GB，𠵱家連60GB都不能倖免，有啲寧願減5,000日圓（約$350）即走，輸少當贏。
文：快D_HL