不知不覺喺英國畢業已經好幾年，一直好想返回Warwick母校，重拾舊日足迹！時至今日，重遊計劃依然遙遙無期，惟有聚會時細說點滴回憶，同學話我多愁善感，當然我唔會介意奇異目光啦！做回自己，一個人如果無感情，同一條晒亁嘅鹹魚，有咩分別呢？
買波飛搭「豬頭骨」
英國牛津劍橋多間著名學府，孕育不少權威學者，教學素質毋庸置疑，除此之外，英格蘭超級聯賽，更加吸引一向熱愛足球嘅我，可以一邊讀書，一邊睇波踢波，同時又親身體驗英倫文化，確實自由自在！
提起英超聯，每逢曼聯、阿仙奴作客我哋高雲地利，班鬼仔同學上堂嗰陣，例必高談闊論，嚟個賽事前瞻，點好人數，入城撲飛更加係指定動作！高雲地利亦都好醒目，為咗確保票房收入，每買1張曼聯作客嘅門票，會方梗會強迫性地要你多買1場豬頭骨賽事，例如高雲地利主場對葉士域治，令到戲碼唔算吸引嘅比賽，都輕易做到高朋滿座！大概這就是英超聯成功之道吧！
馮嘉奇
碩士球員讀萬卷書，親身歷盡各國足球風情。