撚手Game：智奪電視寶藏　奸角Wario7變身

話晒Wario都係任天堂親生仔，咁多年都是「孖寶兄弟」的大奸角！佢做奸角嘅主角，氣勢就力逼Mario，難怪一推出，去貨去得好快。原因可能大家好期待他的變身術，Wario今次又扮太空人，又扮博士，為的都是電視內的寶物，不過，最緊要還是大家要用TouchPen幫手畫變身圖案喎！
記者：馬靜兒

遊戲大綱：走入電視搶寶物

雖然有人話「WarioTheSeven」擺明係抄「惡魔城」，但很多人都因為一看到Wario的造型，就即刻要買，點都好啦！壞蛋Wario本來過着悠閒生活，開電視一看，看到怪盜Aldente，Wario靈機一觸，決定走入電視，將寶物據為己有。Wario製造了一頂頭盔的機器，戴上後就可以進入動畫世界，一走入電視，即刻就搶走Aldente手上的變身棒，走入船艙、大宅、古代遺蹟和研究所等奪取寶物。

點玩法

各師各法

遊戲叫做WarioTheSeven，所以他取變身棒後，就擁有七種不同的變身能力。包括太空人、畫家、博士、怪盜等，利用變身後的秘技，以通過一些地方或取得一些物件用以過關。要變身，大家就要用TouchPen繪畫變身的圖案。
七個造型都幾搞笑，最無禮貌一定係怪盜Wario，只要畫上一個剔號，Wario就可以用肩膊撞擊敵人，十足十平日在街撞人都唔講對唔住啲人咁。不過，呢招好使得喎，但估唔到Wario都會變做太空人，用手上的激光槍，攻擊敵人，同時射向高處，開啓到摸不到的機關，即時增加Wario的能力。去咗黑麻麻的地方，可以用上閃電Wario的夜光照明術，而最衝動當然是變身火燄Wario玩噴火啦！原來畫家Wario都好有藝術細胞，隨手畫個四方形就變出木箱來，用來墊腳去高一點的位置；變身博士時，戴上眼罩，用來找尋隱藏的門和通道。
Wario每次打開了寶箱後，都要玩一些小遊戲。有些人會誤以為很複雜，其實遊戲本身很簡單，有點像小朋友玩填色遊戲，玩時最好以小朋友的心態去玩，否則本來簡單都會變成複雜。你必須贏了小遊戲才可以變身另一個Wario，起用其特殊的能力，但小遊戲到了後期，漸見難度。