話就話遊車河啫，但無嘢玩齋坐車，嘥油之餘，查實好難Hea足一日！想好充實咁消磨全日又所費無幾，有乜好得過釣魚、BBQ、摸蜆兼睇埋日落？玩齊以上節目嘅最佳路線，建議如下：上午先驅車到白泥釣魚，釣到餓可以BBQ，邊釣邊食；黃昏時分再到附近下白泥泥灘摸蜆兼睇鹹蛋黃，回程時順道到流浮山買手信，一日話咁易就Hea咗去啦！
記者：黃婉冰
攝影：伍慶泉
Model：Lo&Tobey
CheckPoint1
初哥一樣釣到大魚
要去白泥一啲都唔難，首先驅車往天水圍，再轉入流浮山，在流浮山迴旋處揀左手邊第一個出口（非尖鼻咀出口），沿深灣路直入約15分鐘，見到右邊公廁停車，便可見到鴨仔坑釣魚場個指示牌。
做完呢份遊車河稿，我開始知道因乜解究啲人咁鍾意山長水遠，都要去釣魚場釣魚，原來，釣魚場啲魚真係易釣好多！而且呢度仲有好多騎呢怪魚上釣，好似位於白泥村鴨仔坑呢個釣魚場咁，睇怕魚種最雜都算係佢；白鱔、石斑、盲鰽、鱲魚、星鱸、細鱗、紅魚、龍躉，連魔鬼魚都有，條條都好易釣，基本上只要識得揮竿就釣到！條條仲有番咁上下份量，搞到我呢類初哥都好有滿足感！
想玩好簡單，每人只需付$70入場費就可全日任釣，嫌自攜魚具麻煩，可畀多$20租埋魚竿同攞一大袋魚餌。拍攝當日，記者、攝影師就親眼目睹過Model用1條魚餌，不消5分鐘就釣到條足有十幾斤重嘅星鱸，難怪魚場負責人麥生不停同我哋講：「好易釣，好易釣！」原來成個塘真係有好多條肥魚周圍游！釣到攰仲可以喺魚場BBQ，但食物就要自備，一邊釣一邊燒，好彩的話釣到魚仲可以即刻燒嚟食。唔鍾意炭燒，可以叫魚場阿姐幫你清蒸，即釣即食，夠晒和味！
查詢：鴨仔坑釣魚場（24726134）
地址：元朗流浮山下白泥村鴨仔坑
入場費：$70
魚具：$20（魚餌、租魚竿）
開爐費： $70（無自備飲品）
$100（自備飲品）
帶走魚穫：一般魚穫$32/斤，白鱔$48/斤，石斑$64/斤，蒸魚加工費$15。
CheckPoint2
摸蜆兼睇鹹蛋黃
玩時玩，唔好釣到忘形唔知時間，事關魚場對面正正就係白泥泥灘，嗰度有好多蜆、蠔任你摸，好似尋寶咁好鬼過癮！唔怕成腳泥，大可摺高褲腳、除埋鞋赤腳行出淺水處，肯定更多收穫，如果好彩嘅話，隨時生猛蟹仔、新鮮流浮山生蠔都俾你掘到，攞嚟整番餐BBQ海鮮宴就盞鬼啦！記者就有位朋友，摸完大堆蜆返屋企，浸過一晚，炒到開殼就食得，若然你唔怕海水污染嘅話，不妨一試！
提議最啱玩時間係下午4點左右，因為泥灘喺正西面，無遮無掩，天色好，只要一接近下午5點左右，鹹蛋黃就會慢慢浮現，望住橙紅色鹹蛋黃摸蜆，諗吓都覺得好鬼浪漫！
提提你
白泥沿途以單線行車，加上有不少暗斜、急彎、盲點位，所以一路上真係要打醒十二分精神，遇上睇唔通嘅彎位時，記得輕輕響一下「按」，尤其是唔係咁熟路，記得慢慢行。
CheckPoint3
流浮山買手信
如果真係嫌齋食魚唔夠喉，可以回程時出番流浮山，一排過幾間海鮮酒家任你揀，乜海鮮都有得你食，大可以飽餐一頓豐富海鮮餐先返歸都未遲！食還食，記得買番一、兩件手信先走，就喺海鮮酒家附近有一條小巷，捐入去就有幾間南貨店，生曬蠔豉、自製蠔油就當然唔少得，想再買多啲，仲有魷魚醬、XO醬、大大隻蝦亁等，記得執番幾袋畀媽媽，包佢唔會鬧你掛住拍拖，無阿媽心肝！
