陳茵媺和葉翠翠兩位港姐冠軍認真同病相憐，皆因她們先後在華姐選舉中被踢出五強之列。據知前者選華姐食白果後，情緒直插谷底，葉翠翠遂於前晚約對方到山頂開餐解心結，事後她更爆陳茵媺連日失眠。
應屆港姐冠軍陳茵媺上周在華姐選舉中大熱倒灶，五強不入之餘，連豬肉獎也沒有份，相當慘情，05年港姐冠軍葉翠翠雖然與她同一命運，去年選華姐被踢出五強，只取得陶瓷文化大使銜頭，聊勝於無。
沉默低頭密密食
繼94年港姐冠軍莫可欣在95年選華姐食白果後，憑奇幻枕頭胸出位的陳茵媺，竟打破港姐選華姐過去12年來起碼獲豬肉獎的慣例，故她為此大感難過，情緒十分低落，難怪作為師姐兼過來人的葉翠翠，前晚特邀約她到山頂廣場采蝶軒泰國菜館開餐，為鬱鬱寡歡的師妹解心結。
前晚約8時，陳茵媺、葉翠翠和港姐保母陳紫蓮（Rosa）已抵食肆貴賓房用膳。就現場所見，葉翠翠和陳紫蓮明顯好傾得多，一面憔悴的陳茵媺只低頭密食，極少搭嘴。兩個多小時後，三人埋單離開，葉翠翠即傍實Rosa並肩行，心事重重的陳茵媺卻墮後尾隨，其後齊登保母車離去。
昨日本報致電葉翠翠，她透露陳茵媺近日經常失眠，她說：「我哋噚日一齊拍港姐宣傳片，之後同Rosa食飯。我哋都係傾吓偈，將以前嘅經驗話畀佢聽，佢冇唔開心，但呢排佢休息唔多，瞓得唔好。五強不入係有少少hardfeeling，我當時都有，但佢盡咗力。」
葉翠翠淡忘舊愛
其實前日是葉翠翠舊愛李逸朗25歲生日，但她選擇了陪伴失意的陳茵媺，即使李逸朗在blog上示愛，她也不聞不問，更反問：「佢生日咩？唔記得，或者sms佢，未必打電話。我諗佢示愛嗰個唔係我，有人有嘢同我講，會打畀我，係唔會寫blog。」
至於Rosa則說：「陳茵媺冇唔開心，佢入唔到五強反而係放低咗，佢EQ好好。」不知陳茵媺會否因胸部屢成焦點而感不悅？Rosa說：「冇，都講咗咁耐啦。」本報又曾致電陳茵媺，但至截稿前仍未接獲回覆。
採訪、攝影：娛樂突發組
