香港唔少人返大陸退休，喺美國就越嚟越多人想去外國過退休生活，因為外國嘅生活費較低，氣候亦相當怡人；部份美國新移民亦想返去自己出世嘅地方，或者喺曾經工作或求學嘅地方生活。MuscleUp話：「由於美國樣樣嘢都貴，好多美國人鍾意去中美洲嘅哥斯達黎加退休，嗰度唔算遠；而我就想去南美洲嘅巴西過埋下半世，得閒坐吓帆船，認真寫意。聽講唔少英國人去西班牙南部退休，但就唔係好識西班牙話，搞到同當地人雞同鴨講。」
貪消費平稅率低
Herring話，多數國家嘅醫療保健費都平過美國。普雷瓦太太講：「如果我喺美國退休，醫療保健開支可能用去40%退休金，所以我打算全家移民去墨西哥。」Hoyden就計劃移居巴拿馬，因為當地嘅稅率偏低。
tortoise講：「我曾經諗過去蘇格蘭退休，主要係貪嗰度嘅天氣較涼爽；不過，𠵱家英鎊滙價好高，加上當地生活費好貴，我擔心將來會負擔唔起當地嘅醫療保健開支，所以最後都係打消呢個主意。」
專家話，雖然出國退休仲未成為主流，不過，好多喺「嬰兒潮」（二次世界大戰結束，美國經濟好轉，促成逾十年的生育高峯期）出世嘅美國人，都想到海外過退休生活。墨西哥、哥斯達黎加、巴拿馬都係著名嘅退休天堂；尼加拉瓜、洪都拉斯、厄瓜多爾，同埋英語通行嘅貝里斯，已成為後起之秀；至於部份歐洲國家亦獲不少美國人青睞。