住宅車位一般幾十萬就有交易，以創下全港呎價最高分層豪宅而出晒名嘅尖沙嘴凱旋門，連車位都貴過人，啱啱錄得一宗二手車位買賣，成交價高達123萬，以同等銀碼，夠買荃灣新盤HCube300餘呎細單位，大啲嘅，樓齡約10年嘅天水圍嘉湖山莊700餘呎單位，都係賣緊百二萬左右咋。
凱旋門車位咁貴，全因供應少，屋苑嘅單位同車位比例係2.5比1，相對九龍站上蓋其餘3個屋苑漾日居、擎天半島同君臨天下，比例係1.6至2比1，凱旋門車位供應最緊張，難怪入伙以嚟只錄得三四宗二手成交，每宗由88萬至110萬。隔籬擎天半島賣緊嘅車位，每個只係四五十萬，凱旋門嘅車位足足貴一至兩倍。
升值23%高過層樓
世紀21經理林俊傑話，個買家知道凱旋門車位供應少，所以先買車位後買單位，反正放盤單位多的是，但車位盤呢？租同賣夾埋都唔夠6個！個123萬車位喺正停車場𨋢口旁邊，方便泊完車上樓，加上單邊，面積比一般車位大，所以貴少少個買家都唔介意。原業主兩年前連單位一齊買入，冇淨車位價，不過根據同期同類冇車位嘅單位成交價計，車位市值大約100萬，即係升值23%，升幅仲好過層樓。
以凱旋門車位月租4000蚊計，若果將個車位出租，回報有3.9厘。𠵱家凱旋門車位放盤叫價月租4000蚊，放賣就約110萬。
過百萬買個車位，好多人會覺得唔值，不過啲富豪就未必咁諗，根據中原地產同埋土地註冊處資料顯示，舊年就有最少4個車位成交價逾百萬，全部喺九龍區，包括最貴嘅九龍塘畢架山一號車位，成交價150萬；跟住何文田山1號車位賣咗128萬；最後兩個分別係尖沙嘴御景臺同凱旋門，分別賣105萬同110萬。
[email protected]