今個禮拜3隻新股（美維、武夷、阜豐）一齊招股，又係考股民眼光嘅時候，《公眾投資168綜合論壇》嘅會員happygooby唔知係咪忙中有錯，填白表時寫支票嘅冧巴，竟然同張票有出入。
驚照過數冇得抽
當佢將支票號碼（xxxx31）寫落白表之後，再寫支票；點知英文銀碼寫錯咗，於是寫過另一張票，號碼係（xxxx32）；之但係唔記得改番張白表上嘅支票號碼。於是好無助咁上網問人，究竟「佢」會唔會照過數之餘，但又當佢無畀錢抽（因白表上嘅支票冧把係xxxx31）──即係錢又畀人凍結咗，但又無機會抽股票的「雙失」慘況。
happygooby所講嘅「佢」，究竟係指招緊股嘅公司、銀行，抑或股票過戶處呢？向有關方面查證後，終於得個水落石出，原來「佢」係指收票銀行。
由於每家招股公司用嘅收票銀行都唔同，例如今次美維（3313）係用滙豐、武夷（1889）就用中銀，因此處理方法可能有別，銀行職員喺核對資料時，究竟會唔會當張表嘅資料錯咗，要視乎銀行政策同實際情况而定。
有可能好彩睇唔到
負責幫武夷做股份登記嘅中央證券登記就話，有兩個情况可能出現：
1.銀行職員睇唔到，照過數畀佢申請；
2.或者銀行職員發現有錯，於是原封不動張份白表寄返畀申請人。
作為武夷收票行嘅中銀職員就回應，寫錯支票冧巴，其實唔係咩大件事，唔似寫錯姓名同銀碼咁嚴重，因此有可能會「過到關」，照樣過數同畀佢申請。