花旗個市前晚碌咗落嚟，科技股跌得最傷，睇個款仲要跌，道指俾佢拖低百幾點，搞到昨日成個亞洲股市走晒樣，全部下跌收市，無一倖免，雖然國內股市收市前掃番上嚟，但形勢上仲係偏淡。
港股喺期指結算臨近嘅時間，好友同淡友埋身肉搏嘅場面一幕接一幕，淡友前日攞到啲甜頭，昨日再下一城，又追番388點，期指嗰邊仲跌咗459點，恒指落番嚟20281呢個位，好淡雙方嘅形勢拉近咗。
雖然港股嘅大形勢仲係睇好，但係短線就有隱憂，呢個隱憂係技術性嘅，都係嚟自期指市場。禮拜四個市跌咗151點，現貨成交好細，但期指所有月份嘅未平倉合約就多咗19053張，增加到15.8萬張，呢個變化絕對唔係好兆頭，如果昨日嘅未平倉合約總數冇乜變，甚至再增加，咁樣，下個禮拜嘅港股仲會有好大壓力，雖然好友仍會把握每個機會頂住個市結算，但頂得越大力，指數嘅跌幅越細，就代表結算之後嘅跌幅可能更加大。
俊樺唔係嚇大家，只係將睇到嘅嘢提醒吓大家，股市係多變嘅，乜嘢都會發生，但係短線嘅形勢的確係差咗，唔可以唔小心。
國壽C輪6125：國壽（2628）已經俾人質咗好耐，昨日曾經見過22.25元低位，晏晝拗腰彈番上嚟，證明條50日線嘅支持力唔細，雖然技術上仲未完全轉好，但博反彈仲有啲值博率，下個禮拜一如果炒上去，日內應該可以試吓25.20元，破位就繼續上，國壽C輪6125昨收43仙，槓桿率5.4倍（有效3.9倍），對沖值0.72，正股升上25.20元，6125喺56仙樓上，正股升上27元，隻輪應該喺70仙以上，正股跌穿22元止蝕。
俊 樺