大馬小賭王林國泰旗下麗星郵輪，最近為咗新加坡聖陶沙賭場度假村項目密密配股集資，投資額足足263億港紙。除咗新加坡，喺今個星期二，麗星仲進軍埋扒咗拉斯維加斯頭嘅澳門賭業，同澳門賭王何鴻燊合作，開間附設賭場嘅精品酒店。何生同四太梁安琪亦入股麗星至少5%股權，大馬同澳門賭王計劃齊齊喺星洲同澳門大搞賭業。
消息一出，新加坡政府似乎唔多鍾意林賭王同何生合作。據新加坡《海峽時報》引述當地內政部話，若有需要，新加坡政府隨時會調查呢單刁，事關有唔少傳聞話，何生同澳門黑道中人有關連，但至今仲未證實到。
新加坡最享負盛名嘅就係嚴厲法律，對打擊貪污舞弊絕不手軟，即使有少少懷疑，要調查都不足為奇。呢個消息對兩位賭王合作有冇影響就未知，不過負面影響已經喺噚日股價反映，麗星（678）收市價跌10.97%，報3.49元。