【本報訊】李栢儉愛出風頭，害他因醜聞丟職；怪行多籮籮，在法律界遺下不少奇聞軼事；貪綜援，令他晚節不保，身陷囹圄，令人欷歔。
李栢儉於74年成為御用大律師，81年獲直接委任做高院大法官，專責商業訴訟，駐灣仔新鴻基大廈，從未在現時的高院大樓審案。
站門外向法官鞠躬
「李栢儉鍾意坐Bentley（賓利）返工，唔係勞斯萊斯，司機要着制服，全白色，要戴帽。」一名曾與李栢儉共事的前法庭人員說。「李栢儉一定着燕尾衫，斜條褲，不論天冷天熱，都戴紳士帽，攞遮。」
崇尚中國文化的李栢儉，寫字樓門口及走廊，貼滿唐朝大將軍秦叔寶門神像。
該名前法庭人員說，李栢儉審案，奄尖腥悶，又因「識啲中文」，會批評繙譯員錯譯，「證人話『一五一十』講出嚟，繙譯譯做『tellthetruthfrankly』，佢話唔係，係『onefiveoneten』。」
至於傳聞李栢儉要證人宣誓時掟碟、吹蠟燭，均屬事實。「掟碟係代表講大話粉身碎骨，吹蠟燭都係死嘅意思，但買碟嘅錢，就唔知邊個畀。」
有資深法律界人士說，李栢儉叻，但「癡癡哋」，「佢會喺兩點午飯時間後，企喺大門，向返法庭嘅法官鞠躬行禮；佢寫過一篇同廁所有關嘅判詞，寫得好下流；90年伊拉克入侵科威特，佢喺倫敦着伊拉克衫，話要幫科威特，唔makesense！」
吹噓二戰立功丟職
馮閏禪育有一子梁浩德，60年再嫁給李，因洋名Lucille，綽號「陸小鳳」，胞兄馮萬榮曾是前西區裁判署裁判司，該名資深法律界人士說，馮閏禪甚少打官司，上庭會攜同兩菲傭，左右護駕，帶備茶葉及茶壺泡茶，「佢好蠢，唔識問問題，要啲junior做晒準備工夫。」
李栢儉於87年被報章揭發他在《Who'sWho》名人錄上虛報資料，吹噓二戰立功，結果自動辭職；但李栢儉仍有不少朋友陪他消遣，甚至資深大律師王正宇，眼見師傅落難，也仗義替他求情。
