香港3G電話發展到現在，已可以用3G手機睇電視，講Skype話音，收發電郵，上eBay購物，以及MSN對講。下一步又如何呢？3G專家W話會將手機當八達通來付款、開閘，瓣瓣齊。
咦？睇雜誌知道，波羅的海小國愛沙尼亞（Estonia）已經行早一步，除咗首創Skype之外，該國人民已經可以用手機購物，泊車付款……香港唔夠人哋咁先進噃。呢個小國喺一九九一年先至脫離蘇聯獨立，發展一日千里，成為東歐先進國家。據雷鼎鳴教授寫文章紀念佛利民講，愛沙尼亞第一位總理MartLaar就任時只有32歲，據稱完全不懂經濟，但讀過佛利民一本書──《自由選擇》，以為係經濟學聖經，膽粗粗樣樣照跟，例如平衡預算，劃一低稅率、貨幣自由兌換、行聯繫滙率、私有化國營企業，全面市場自由化……十六年來，愛沙尼亞政府上台下台如走馬燈，但經濟就非常之掂，重產生一間Skype，俾eBay以二十六億美元買咗。
問專家W：「點解人哋會叻過香港呀？」專家W說：「人哋小國寡民，地方細小，全面發展寬頻，故此後發先至。其實香港都唔曳㗎，全球寬頻滲透率排第二名，僅次於南韓。西歐、美國喺呢方面相當落後，原因係地方太大，喺一啲美國州分，鋪光纖三十里路先至到達一戶人家，邊個肯投資吖。」香港嘅通訊網絡建設，已位於世界前列，但內容方面仍有待加強，與日本3G相比，人哋嘅內容、訊息就特別多。
揸住部3G手機消費者最鍾意做乜嘢事呢？講電話自然係首選，SMS次之，攝影第三，跟住係賭波、賭馬，然後係……專家W賣一個關子，等左丁山猜想一下。點估呀，催促專家W開估，佢微微嘴笑：「睇成人節目。」哦，成人節目係賣點之一，記得好多年前香港首創VOD，蝕到香港電訊攤攤腰，但有一項電影最受歡迎，聽L博士講，就係成人片啦！而且睇成人片嘅黃金時間係朝十晚四之間，邊啲人會喺屋企睇呢？木宰羊。現在揸住部3G手機就可以睇，不分時候咯。