大劉劉鑾雄個仔劉鳴煒，上個月中出任華置執行董事以嚟，噚日首次處女登場，主持華置一項澳門住宅項目銀團貸款簽約儀式。做阿爸嘅大劉梗有捧場，一直坐喺觀眾席上昅住個仔嘅表現；當阿仔開始時用英文發言，佢喺背後畀意見：「用中文好啲！」不過，佢坐一陣就離場，將個舞台交晒畀阿仔發揮，費事搶咗阿仔嘅主角地位。
華華問細細劉，阿爸傳咗乜嘢做生意招數畀佢？佢話，阿爸由細到大都教，做生意最緊要「睇時機同啱價錢」。
佢去年9月開始喺華置工作，以噚日嘅表現，華華覺得都算唔錯，有唔少應付傳媒嘅招數，相信係阿爸一早教落；例如記者問到澳門房地產市場毛利率同香港點比較時，就話：「我遲啲畀資料你。」
當記者問到華置大陸房地產業務時，佢就話：「大陸啲問題今日唔方便答，今日主要講澳門項目。」而佢亦準備充足，介紹澳門樓市時引述市場調查，話澳門新經濟需要額外7萬人，當中一至兩成為管理層，對高級住宅有需求。答問題亦揮灑自如，神態輕鬆。
當然處女作梗有少少瑕疵，原本華置澳門整個住宅項目地價14億，首期建築費18億，佢就講首期總成本14億元，好彩事後公關更正番。