今年三月二十五日特首選舉，投票點票地方離開市區十分遠，要去到機場嘅亞洲博覽館，因為○五年董特首腳痛之後，政府知道○七年會有特首選舉，想話卜定會展中心，點知已經冇位，而選舉會場需要四至五日空檔，會展一於話冇期，可見香港係展覽之都，無時無刻都有展覽。
選委Ｘ唔多高興要揸四十分鐘車或坐機鐵趕去機場亞洲博覽館，對左丁山講：「選舉香港特區行政長官，係特區頭等大事，點會畀人霸咗個地方去㗎，我好想知道三月二十五號灣仔會展中心有乜嘢事可以重要過特首選舉？」呢樣就唔知咯，記者請為我哋八卦之心着想，去查吓。
選委Ｘ又話：「到灣仔會展投票，好輕鬆，必要時可走番出嚟，去酒店鬆一鬆，或者返公司簽吓支票。唉吔，搞到去機場咁遠，來往不便，好嘥時間啫！又怕到時有乜依郁，發生意外，點算？」
啋，發生意外？千祈唔好。不過近日睇電視，南非足球場居然臨時颳起一陣狂風，將廣告牌吹起，橫掃球場，好似我哋擺一張紙巾喺風扇前面咁樣；另外，歐洲國家突受狂風暴雨襲擊，英國有汽車被大風吹倒，橫卧路上。你話三月二十五日如突發狂風，青馬大橋關閉，機鐵因狂風而發生故障停駛，你話點算好？八百壯士（尊貴的選委）點樣去會場投票呀？
選委Ｘ講到杞人憂天，無非太過鍾意在市區投票點票，求方便啫。佢話梁家傑頂多得百零票，絕冇機會贏，但有選舉就不能出意外，到機場投票，就增加咗出意外嘅機率，哪怕丁屎咁多。
出得嚟選舉，就要展示一啲取勝信心，冇理由一早話自己輸一百個馬位嘅，唔同對手過幾招嘅。香港社會好奇，梁家傑話一聲自己有信心，立即畀兩位女士（仲以為佢哋係民主派㖭）張牙舞爪咁鬧餐懵，話梁家傑斗膽想做特首。呢兩位女士嘅思維邏輯，打橫扭曲無與倫比，公眾人物如此反智，可悲也。