中國財險（2328）同埋中國人壽（2628）近排新聞多多，又話易帥轉過頭又話唔易，事件如何發展，相信仲會係下星期嘅市場焦點。其實財險早於本周一已經炒起，股價急升一成，事緣財險副董事長王毅突然出口術話，集團去年度稅前盈利將增長逾8成，主要來自投資回報，而投資回報升幅大於保費收入升幅。
一次出口術都唔夠，到周三有關人士向通訊社報料，話國壽楊總會過檔財險，搞到國壽股價跌，財險股價就再勁升，連電台講股節目主持人都講埋一份，話財險增加保險收入不力，換老總會有好大幫助云云。一連串市場消息突然出現，而且財險本周升至5元樓上當日成交有323球，高過平日成交量好多，係咪咁巧合呢？既然有懷疑，此股暫時都係咪沾手好啲。
如果有得揀，點計都係壽險股好過財險股，因為財險收入來自每年續保，保費則因應風險評估所得而定，保費扣除賠償金額及營運開支，財險公司至有得賺，如錯估風險，或投資失誤，好易變成冇得賺。參考往績，財險曾因投資失誤而令業績不振，所以一話換老總，股價至升得咁勁。同樣係保險公司，有冇見過國壽同平保（2318）管理層跑出嚟話投資回報點勁法？
中國七星升極唔停
前稱為藍頓嘅中國七星（245）近期股價升極唔停，該公司現於沿海及西南地區經40個電視頻道推銷產品，當中以化妝及護膚品為主，市場份額約9%。中國消費品股極受芬佬愛戴，難怪之前兩次七星大舉集資，都有著名大芬落飛，而股價升極唔停，亦係芬佬股特色。噚日七星又升21%，收報0.54元，聽講有好戲跟尾。
歐陽風