【記者林浚川報道】私家醫院聯會曾多番表示優先保障本地孕婦權益，但位於港島半山區的嘉諾撒醫院近日卻要求本地孕婦和內地孕婦一樣，預約時繳付全費或兩萬元作按金。有本地孕婦批評院方做法是要趕走本地客，以便大做內地孕婦生意。聯會會長劉國霖表示，正極力游說該院遵守保障本地孕婦的協議，但承認有關協議無約束力，惟有寄望各私家醫院自律。
不保證有指定床位
「我以為內地孕婦先要畀全數按金，點解香港人都要？畀咗全數又唔保證預產期之前一定有床位，真係好無奈。」準媽媽santorini在親子王國討論區批評，嘉諾撒醫院突然要本地孕婦預先繳付全數費用作按金，沒有落實優先保障本地孕婦權益的政策。
記者昨日以顧客身份致電嘉諾撒醫院查詢，院方職員表示，現時產科床位已排期至6月，本地孕婦如要預約床位，無論是三等或頭等房，自然分娩抑或剖腹產子，一律需於預約時繳交兩萬元按金。職員更稱，若孕婦屆時「甩底」又無合理解釋，院方不會退回按金；即使孕婦準時入住，院方也不保證當日會有指定床位，屆時孕婦若入住收費更高的病房如頭等房，就要補回差額。
「醫方可收多啲錢」
準媽咪winnie108形容院方此舉是要趕走本地客，多做內地孕婦生意。「如果本地孕婦不願意支付全數按金而轉院，私院咪大條道理把所有床位都留畀大陸孕婦，佢哋咪可以收多啲錢囉！」爭取本港孕婦權益行動發言人劉太批評，嘉諾撒的做法令孕婦猶如「肉隨砧板上」，「到時去到醫院要生至話冇三等房，要我畀多啲錢住頭等，我臨時臨急都搵唔到第二間醫院生啦，咁即係焗我要畀多啲錢啫！」
劉國霖表示知悉事件，正游說對方遵守協議。「九間私院曾經協議只向非本地孕婦預先收取全費作按金，𠵱家佢哋突然咁做，本地孕婦一定覺得佢哋搶錢，然後轉院，咁佢哋咪做晒內地人生意囉！」劉國霖表示已獲對方承諾盡快調整政策，有信心該院會優先服務港人。
消委會發言人形容嘉諾撒醫院的做法「苛刻」，呼籲消費者付款前要審慎考慮。嘉諾撒醫院至截稿前未有回覆。