最鍾意日本料理做特價！魚類新鮮有光澤，暗黑瘀黃唔好食，冇得偷工減料冇得呃！荃灣風月日本料理專為《蘋果》讀者特選了多款魚生、壽司，全玩底價6、7折！大隻佬William同Low一聽見馬上試「擦」，食完兩個異口同聲話：「食晒佢真係足4人份量，警告冇我哋咁大隻，2、3個人休想食得晒！」
記者：朱崇德
攝影：陳偉強、朱崇德
Model：William、Low
日式魚生小店風「味」
入到風月，兩個大隻佬馬上精神為之一振！開門，衝入鼻嘅係一股濃烈魚肉麵豉味！餐廳細細間，日本料理本應係咁嘅風味！店員樓面全部清一色後生仔女，不過咪睇小佢哋，大部份係「三上」嘅過檔Fit馬，「三上」係乜？西九龍區日本料理龍頭店，深水埗區兩店都過千呎，日日排長龍！
實收餸錢 冇加一
眼見魚生櫃內嘅三文魚、吞拿魚、海膽塞到滿，阿廚南哥話：「魚生最緊要新鮮，眼睇要有光澤，根本冇得呃！再留意我哋嘅開店時間，是同區日本料理罕見做到凌晨1點，日日夜市殺到落凌晨，包冇隔夜貨！」貪心嘅Low等唔切做訪問，馬上喪叫一Round特價日食：「碟碟件頭同我哋一樣咁大隻，最重要係呢度全冇加一小費同茶芥，叫$215嘢食，淨收實餸價，咁先係真減價嘛！」
（前）辣味三文魚壽司
原價$16特價$10/2件
（後）辣味三色壽司
原價$18特價$10/2件
屬餐廳自創菜式，前者用三文魚肉粒；後者則以甜蝦、三文魚、吞拿魚粒包壽司飯及紫菜製成。兩者最特別在個醬汁，是以韓式泡菜之辣汁醃製，入口酸酸辣辣，同魚生粒又夾又惹味。
日式炒蜆
原價$40特價$25
餐廳熱賣招牌菜，以日本辣醬配中式的蒜香做法炒成；入口辣椒味極嗆，有點點刺鼻的感覺，再在口腔迴盪着的，是蜆蚧獨有的鮮甜；菜式幾有睇頭，蜆足有1斤，$25落大牌檔隨時唔止呢個價。
芝心龍蝦丸
原價$25特價$15/6粒
以鮮打龍蝦丸，內包芝士、外裹麵包糠再脆炸；入口先感拮口，再嚟是濃重的龍蝦鮮肉香，咬到裏面要小心芝士熱汁漏出，小心辣親個口呀！
海膽拼盤
原價$158特價$110
海膽一大板，任叫魚生櫃內嘅魚生3款各4件（牡丹蝦除外），基本𩶘魚、吞拿、章紅、劍魚腩、針魚、甜蝦、帶子等有齊；記者推介係甜蝦、帶子及劍魚腩，來價貴，口感好。
大隻佬大食餐單
海膽拼盤 $110
三文魚壽司2件 $10
燒鰻魚壽司2件 $15
辣味三文魚壽司 $10
辣味三色壽司 $10
芝心龍蝦丸 $15
脆炸腐皮蝦 $20
日式炒蜆 $25
合計：$215（正價$326小費、加一全免）
防諾沃克病毒注意衞生
呢期日式料理店內最熱話題，一定係爆發諾沃克病毒！因為毗鄰的日本已有三百萬人感染並導致幾個人死亡！同大廚傾偈，佢話近來生意麻麻，都係歸咎於此：「日本咁先進講求衞生都防佢唔到！加上日本人又鍾意食魚生，所以好多人會將兩者關連埋一齊！」所以呢期好多日本料理及魚生店，都對衞生要求特別高，基本埋魚生枱前，佢哋都會用消毒梘液洗手，最緊要亁淨嘛！
睇路搵食
風月日本料理（26141884）
地址：荃灣眾安街20號地下（近千色店側）
座位：約40個
營業時間：星期一至五12nn-3pm、6pm-1am
星期六、日及公眾假期12nn-4pm、6pm-1am
優惠期：即日至2月25日