歌神許冠傑行徑有幾怪？胞兄許冠文子女的婚宴他沒到，母親壽宴一樣不見蹤影，連舉行演唱會也拒絕宣傳。原定今年4月再開個唱的他，因向主辦機構耀榮公司提出不做任何宣傳的要求，「香港演唱會之父」張耀榮被激得生蝦咁跳，揚言隨時準備取消這個演唱會。
許冠傑（Sam）2004年復出樂壇舉行44場演唱會，場場叫好叫座，05年2月馬上添食，由於個唱舉行得太頻密，令歌迷失去了新鮮感，入座率自然下滑。今年阿Sam捲土重來，聯絡「香港演唱會之父」張耀榮為他主辦個唱。阿Sam原意是舉行10場演唱會，但耀榮只答允為他開八場，近日更有傳雙方因宣傳問題有爭拗，原定4月舉行的個唱面臨泡湯。
憂慮票房
「宣傳唔做風險好大」
其實近年頻傳阿Sam的行徑越來越怪誕，經常足不出戶，除了妻兒外，幾乎任何人也不想見，不但胞兄許冠文的子女擺結婚酒沒有到賀，連母親的壽宴一樣缺席，只派太太和兒子任代表。雖然阿Sam怕見人，但舉行個唱時站在台上可享受萬千歌迷擁戴，所以他明知前年演唱會反應麻麻，今年還是蠢蠢欲動，不過阿Sam卻向主辦商耀榮開出怪條件，聲明不會為個唱宣傳，令耀榮難以接受。
昨日張耀榮接受電話訪問時說：「𠵱家演唱會咁難做，如果歌星本身連宣傳都唔肯做，我真係擔心唔知啲飛點賣，阿Sam要求唔做記者會、唔出席慶功宴，訪問又唔願做，咁樣點搞呀？」
張耀榮開設耀榮公司主辦演唱會逾20多年，當中有不少演唱會均蝕本收場，但他從未想過放棄主辦演唱會，為何今次對阿Sam不肯宣傳會如此大反應呢？張耀榮解釋說：「好多朋友都勸過我，如果阿Sam連宣傳都唔做，風險會好大，叫我不如唔好做，咁我覺得啲朋友講得有理，所以佢堅持唔讓步嘅話，咁就算啦！」不過之前有報道卻指阿Sam嫌張耀榮太多錢債官司纏身，有意借勢飛起他。
其實張耀榮對經營演唱會的情意結極深，因當年華人歌星舉行演唱會的潮流乃由他一手開創，故經營演唱會這門生意如何艱難，他依然堅持下去，他說：「其實我搞咗咁多年演唱會，的確有心想幫個樂壇搞得興旺啲，所以明知近幾年搞演唱會冇乜錢賺，我都堅持做落去，好似早兩年阿梅臨死前曾經走嚟搵我，話希望喺死前可以開最後一次演唱會，如果我唔答應，佢話死都唔會眼閉，以我同阿梅嘅交情，佢講到咁，就算有幾多風險，我都要做，因為做人一定要有情有義嘅。」
感觸良多
「唔係個個歌星識感恩」
張耀榮感慨續說：「但有時唔係個個歌星識得感恩，有好多歌星嘅第一個演唱會都係由我搞，到人紅咗，又未必有我份搞，咁多年嚟，我覺得劉德華、陳慧琳同葉蒨文最有良心，咁多年嚟佢哋每次開騷都會預我一份。」
此外，張耀榮前晚出席蔡琴演唱會慶功宴時，提到早前遭時富投資公司以索償6,000萬元款項而申請他破產，又遭藝能娛樂（國際）有限公司，入稟高院追討82萬欠款而申請他旗下公司清盤，張耀榮表示不談時富案件，但他說：「藝能欠我百幾萬，係我畀錢佢哋投資嘅，都未計好，呢單嘢最好上法庭啦，到時畀律師處理，冇得庭外和解，佢哋都唔鍾意傾，等法庭判啦，3月先知結果。」
張耀榮又自言財政沒問題，他說：「我有兩個大老闆照住，就係何鴻燊同李嘉誠，我仲有樓，九龍塘嘅物業值成億幾，點會冇錢？」
採訪：葉雪、駱華齡
攝影：陳志嵐
