買樓遇着特別超抵價單位，千祈唔好以為執到筍盤，亦唔好俾喜悅衝昏頭腦，因為個筍盤好可能有啲嘢……
網友Ragdolls上個禮拜就見到一個超抵銀主盤，400呎開價38萬，雖然冇講係咩區、咩樓，但係950蚊呎，幾乎平過居屋價，點計都係抵。點知一去滙豐做初步估價，價值竟然係零！明顯係有事發生過。佢仲話同層嘅其他單位，加埋樓上樓下都一樣估唔到價，覺得班街坊好慘，所以喺《香港討論區》問大家有無辦法解救。
估唔到價好慘
victoriaahpak即刻回應：「我成日有諗，點樣可以幫呢啲業主。教會可唔可以諗吓買呢啲單位，再放租畀啲信徒，既可作為教會固定收入，又可以幫助一啲環境麻麻嘅教友（教友無理由信鬼神啫）？好過丟空間屋，有屋無人住，有人唔敢買嚟住……」聽落又幾一家便宜兩家着喎。我又回來都和議：「又有得諗喎，教友每個月都會捐獻人工10%出嚟，利用呢啲捐獻去買呢類單位做教會會址，何樂而不為呢？」GOG話：「如果有成層嘅單位都無人要，咁成層買晒，打通佢，咁就正啦。」victoriaahpak又再發揮佢嘅諗頭，「如果真係咁大，我會建議做護老院，老人家有乜未見過喎……」
講咁多，其實全部都係天馬行空，由教會做包租公，都算係可行方法；但係轉做教會，甚至護老院，情況可能比較複雜，popo7講出其中一個唔可行嘅原因：「住宅用途改為商業用途？好似唔得噃。」事實上，住宅單位用途好睇份樓契點寫，如果份契寫明係商住用途，或者冇寫明唔准商業用途，就開乜都得，當然唔計黃色架部或者賭檔；但如果係純住宅物業，就一定冇得傾。
有時啲嘢無得好講，如果無情情慘變凶宅鄰居，惟有自求多福，一定要甩手嘅話，最好就租出去，再唔係賤價賣都無辦法，始終買樓都係投資，投資就有風險。