聖安娜噚日喺股東特別大會上，審議出售公司股權畀利亞零售嘅私有化議案，雖然出席嘅小股東有超過91%贊成，但亦有8%（相當於1500萬股）反對，差啲通過唔到（只要有一成反對議案都會被否決），收購建議險遭滑鐵盧。
聖安娜嘅小股東可以喺2月22日之前，揀全以現金售股，或一半現金一半利亞股份作交易；原大股東香港飲食主席陳偉彰話，香港飲食決定揀全現金方案，因為換股會涉及大批股份，手續較多。對於小股東，佢建議睇吓利亞股價係咪喺每股2.95蚊現金收購價以上，同時考慮股價上落、手續費同經紀費等，至諗要錢定要股。
陳偉彰又話：「整餅都唔錯，想學可以教你。」咁會唔會傳授心得畀新大股東利亞嘅行政總裁楊立彬？陳主席就話：「佢咁叻，唔使啦！咪睇小佢呀！」