投資者熱衷股海尋寶，汽車股、工業股及航空股等落後股先後被炒起，網友Kong030397喺《Uwants討論區》就叫散戶小心啲，唔好買電力股，因為早排國家環保局將華能（902）、中國電力（2380）、大唐發電（991）及華電（1071）4大電力公司列入黑名單，指佢哋違反國家環保政策，暫停新項目發展，嚟緊呢啲公司肯定會增加開支，以符合國家要求，盈利同股價無可避免受拖累，「未來電力股就算冇被政府打壓，都肯定冇以前咁支持，佢哋嘅股價就算唔跌亦唔會點大升，買過第二啲行業好過喇！」
國家政策要搞環保
國務院前總理李鵬個女李小琳係中國電力嘅首席執行官，網友Spwii打趣咁問：「環保局咁大膽？連李鵬個女都敢調戲？」Rodshow就唔係咁相信，「大陸邊度會重視環保㗎！環保局講嘅嘢你可以當冇到，根本唔需要為呢樣嘢擔心。」
Cychk就諗，「可能國家想喺奧運前搞好啲環境喇！」Punkin就話：「呢幾年中國不計成本咁放咗大量金錢喺環保，改善日益惡化嘅空氣同水源，淨係核電廠都有十多個喺度籌劃中。」
大行唔擔心仍睇好
大行亦唔多擔心國家嘅環保國策，瑞銀研究報告指，環保局下令大唐發電關閉部份燃煤發電廠，對大唐影響輕微，但就打擊非法嘅舊電廠，紓緩電力供過於求問題。雷曼則指，內地統一稅率，華電將最受惠，其次為大唐。高盛喺23號就發表咗份報告，維持未來12個月睇好內地電力股，估資金會換馬至電力股，較睇好華能同大唐。
華能、國電、大唐同華電噚日分別收報7.31元、4.27元、8.29元及2.97元；今年嘅累積升幅以華能最好，升逾5%，其餘就冇乜點郁。滙豐對呢批電力股最新嘅評級，華能同中國電力為「中性」；大唐發電同華電就「增持」，目標價分別係10元同3.5元，仲有21%及18%上升空間。