今個星期玩乜Game？唔使講，最多人玩、最多人講係NDS呢隻《三國志大戰DS》，由街機卡片遊戲移植，未推出前已坐擁一大班原作Fans，走到NDS人氣一樣旺盛，保留原著精髓同時，亦有家用版原創要素，屬今周必玩之作！
記者：許福合
扭轉NDS玩
NDS版《三國志大戰DS》充份利用NDS雙芒嘅特性，一進入遊戲，玩家就要將NDS扭轉成縱向來玩，一邊屏幕會顯示戰場實況，而輕觸式屏幕就會成為街機用以推卡盤面，只係今次換成用筆來推卡。根據試玩同網友心得，此作移植度都相當高，於街機一向用慣各種戰術策略，同樣適用於NDS上。
NDS版內會收錄超過300張三國人物卡片，每局無論勝敗，都會隨機分派一張，卡片設計同真卡片一模一樣，資料詳細，同樣會以白、黑、銀同金來分辨罕有度，玩起來份外有趣味。
上網對戰換卡
遊戲基本上有兩個模式，有時甚至鎖定幾張必用卡片，因為要配合故事發展，卡片組合彈性比較少。另一個鍛煉之章就如單人模式，有唔同難度可選擇，卡片組合可隨意配搭。對戰玩法更係NDS版最出色地方，可經Wi-Fi與另一部NDS或上網與其他玩家對戰，不過留意上網對戰，因為唔可以選擇對手，部份輸唔起嘅玩家當發覺輸定時就會關機斷線，不留下敗仗紀錄，都幾無癮㗎！除咗對戰，仲可以與朋友以一張換一張方式換卡，有志收集全套卡片玩家就要努力喇！
Profile
主機：NDS
種類：卡片/實時戰略
開發：SEGA
售價：$370-$420