安德尊早排同黃霑愛女黃宇詩上無綫節目《15/16》時，安德尊攞黃霑嚟開玩笑，搞到黃宇詩黑面，點知前晚輪到黃宇詩玩到人黑面。
喜愛成熟男士
安德尊、黃宇詩前晚同05年度港姐亞軍陸詩韻一齊去將軍澳電視城錄影《問題娛樂圈》，陸詩韻之前同草蜢喺《慈善星輝仁濟夜》表演火辣拉丁舞，於是前晚佢哋一出場，安德尊就搞氣氛問現場觀眾：「你哋有冇睇陸詩韻跳拉丁舞？使唔使佢跳part你哋睇？跳乜好呢？」本來陸詩韻仲笑緊，點知黃宇詩即答話：「梗係脫衣舞啦！」此話一出，陸詩韻頓即黑面，安德尊仲要加句：「好彩唔係我講啫。」不過之後大家當冇件事，繼續錄影。
陸詩韻最近俾雜誌話佢同富商曾文能遊日本，又話佢出入以平治房車代步，講到有啲曖昧，佢前晚解釋：「部車係我爸爸出畀我，我都冇喺佢哋講嘅航空公司做過，個標題令我好唔開心，家人都問點解要咁寫，無綫有問我，我就講事實畀佢哋知，嗰個只係朋友，識咗一段時間啦。」陸詩韻話自己𠵱家冇男友，佢係鍾意年紀大嘅男人，尤其成熟型，大十幾年都冇所謂，男人唔使靚仔喎。