上星期六跑馬，有港大校友會挑戰盃（第八場），好多港大校友到場，包括環保專家廖局長在內，廖局長嘅阿哥約克博士新近做咗港大校董，亦有參加埋一份。港大人識得做，識得玩，馬局長係一個典型。相反，啲中大人就多數識得做，唔識得玩，十分拘謹，唔知係唔係與校園地理有關。港大學生行落西環、西營盤就可以玩到癲。中大生就匿埋宿舍，如無巴士火車接駁，行去沙田、大埔，會十分辛苦，故此讀完書出到社會做事，都唔多識得點樣玩個痛快，例如同樣係參加跑馬日，港大校友就比中大校友更投入，更熱情。
今年港大校友盃，老早知道姚本輝馬房隻「蓮華生輝」贏梗，無甚趣味，賽馬會廂房外露台，見到練馬師Ｌ正在吸煙，費事同佢講邊隻會贏港大校友盃咯，只問佢禁煙之後慣唔慣。練馬師Ｌ說得坦白：「我以前喺外國，老早唔可以在室內吸煙，冰天雪地之下，同班鬼佬企喺街頭食煙，試得多啦，所以香港禁止室內吸煙，並無大不了，啲反對人士嘈得滯啫！」後來在廂房碰到建築邦，佢話室內禁煙係德政，佢𠵱家喺灣仔檀島茶餐廳食早餐，不聞煙味，煙客全部失蹤，佢覺得非常之爽爽爽。建築邦都諗唔到香港啲煙民如此順攤，有法例就依到足。左丁山老早知道香港人好守法，政府管治十分容易，邊個做特首都管得掂。
早兩日喺雪廠街近FCC碰到肥仔孫、肥佬富等獅子山學會人物，原來食完午飯想搵地方嘆支煙，於是左丁山帶佢去到安蘭街街尾，新世界停車場入口外面。呢度有個垃圾桶，上有煙灰盅，唔少人站在樓梯口吸煙。帶住佢哋行埋去之時，一位衣着入時，面貌娟好之中年婦人面紅紅咁立即㩒熄支煙，匆匆離開，大概中年婦人有啲怕醜，唔想與成班男士一齊企在街頭吸煙啩。不過除非戒煙啦，否則無地容身，女士只好企街吸番幾啖。講起嚟，啲年青女士就唔會怕醜嘅噃，中環街頭經常見到兩三位年青女仔企埋一齊食煙，旁若無人。可能，比佢哋大十零年嘅吸煙女士係細膽啲。