曾經玩過《GTA》嘅話，點會唔鍾意過壞男人嘅生活？感覺就好似睇緊《放逐》，死都型仔過人！今次遊戲監製DavidJones再炮製超人版《GTA》，取名《Crackdown》，玩家「從良」做警察，暴力程度激過上集，可以十幾層樓跳上跳落，執起成噸貨櫃「車」埋去，感覺好High！
記者：陳國輝
攝影：伍慶泉
美國取景走一圈50分鐘
畫面靚唔使多講，值得一提係畫風好有動感，其中一名剃短頭髮嘅角色，睇落十足老邦三世咁款！《Crackdown》有好多爆炸場面，煙霧彌漫Effect脫離漫畫，回歸真實，碎片會一粒粒咁彈埋嚟，扮勁衝去駁火死得仲慘。埋身隻抽動作亦好仔細，唔會齋拳腳咁悶，你可以趁佢瞓喺地下踢多兩嘢，爽呀！
《Crackdown》學足《GTA》，冇路線、冇故事，去到邊打到邊，最爆係版圖多達150平方公里，揸車亦要50分鐘先走完一圈，你會途經好多美國大街同旅遊景點，例如金門橋、紐約市中心等，如果未去過更加要留低條腳毛啦！
善用ASP點對點傳送
版圖咁大，咪好浪費時間？遊戲裏面特設「AgencySupplePoint」，功能似《Matrix》嘅電話亭，主角可以點對點被傳送到另一地方，仲可回復體力、更換武器、獲取情報。
食能量球增功力
喺《GTA》入面，角色能力被鎖定，冇得發展落去，但《Crackdown》則提供能量球，只要不斷吸取，就可以提升主角嘅駕駛、敏捷、武器、力量及爆破度數值，食得多，仲可以越級挑戰另一版圖嘅黑幫大佬，等你快啲爆機。
二人網上廝殺仲爽
得自己一個唔夠抽點算好？呢隻Game本來就只係提供單人模式，但透過XboxLive，你可以搵多一名Online隊友同你並肩作戰打大佬，甚至同時喺城市嘅南北兩端，兵分兩路、上下夾攻，多個戰友肯定慳番唔少時間，當然遊戲過程亦會更加熱鬧，唔使一個人玩咁靜局啦。
推薦必玩Point！
揸車亂片
超過100種車款，你可駕駛超級吉普車橫衝直撞，撞死路人都唔使賠命，感覺興奮到不得了。
廢城混戰
試玩版已夠精采，廢城混戰要車輪戰向敵人開火，死完又嚟多批，成班複製人咁，打到手軟！
明星評價
Suki：「玩得好緊張，因為好容易就冇晒彈藥，要就住嚟射，唔可以浪費；另外係主角可隨街拎起任何嘢做武器，覺得隻Game好真實。」
Jason：「我覺得啲畫工好靚，班角色揸槍姿勢又有型，仲可以隨時執起敵人啲武器用㖭，能夠玩齊晒咁多款槍械就好喇！」
試後感：唔夠血腥暴戾
《Crackdown》有爆炸、幾十人駁火、揸住裝甲車片嚟片去，畫面好豐富；不過，廝殺略嫌唔夠暴力，好似敵人中槍之後不單只閃咗幾下就算數，想多幾滴血都冇，最搞鬼係死嗰陣連屍首都搵唔番。好多追求動作Game嘅玩家，勁鍾意加入血腥暴力，例如踢爆頭顱、射到斷手斷腳，甚至乎將身體劈開一半，雖然暴力咗啲，但為咗令玩家打得更加肉緊，應該要有嘅。
PROFILE
機種：XBOX360
開發：RealTimeWorld
類型：動作
人數：1或2（XboxLive）
推出日期：2月22日
售價：$299