地產部落:初哥揀樓的疑惑

地產部落:初哥揀樓的疑惑

炒家掃美孚新邨成為城中熱話,搞到揀緊樓嘅網友chimpan十五十六,上《香港討論區》問大家覺得揀美孚新邨好,定係何文田居屋俊民苑好。其實兩個盤喺唔同地區,又係唔同貨種,唯一共通點就係樓齡舊;不過,都有唔少網友回應。
雖然話兩個屋苑分別好大,但就有網友henchan兩邊都住過,呢個稀有例子話,俾佢揀,始終都係揀番美孚,原因有3:「1.交投暢旺,容易甩手,加上近來有炒家入市迹象,樓價再升10%不難;2.交通方便;3.用料好,好多裝修師傅都話,要鑽美孚嘅牆都幾吃力。」至於俊民苑嘅評語就係:「第一代居屋,建築用料質素非常差勁,樓上3層樓喺廚房用砧板,我都可以喺睡房聽得一清二楚,仲經常聽到樓上啲拉枱拉櫈聲,樓上如果無着鞋四圍行,都聽得好清楚。」

忌貪平 難轉手

亦有網友miamia提醒話:「美孚要小心揀,我有朋友住咗一年,發現漏水情況好嚴重,佢已經換晒電線水喉,都出事,最後賣咗。」bbqbbq就覺得:「俊民苑校網好。」e90就撐話:「俊民苑都唔係咁差,點都係市區呀,幾好住,交通都算可以接受;只係食肆唔係咁好,好差。」
雖然美孚新邨同俊民苑,每呎造價只相差三、兩百蚊;但講到成交,美孚就贏幾十條街,𠵱家閒閒地每個月都有幾十單,今個月截至禮拜一,仲超過110單,反觀俊民苑就只得幾宗。
始終俊民苑只得12幢,加埋只得大約1800個單位,同巨無霸美孚新邨總共99幢,超過1.3萬個單位比較,二手市場規模可謂蚊髀同牛髀。對一般人嚟講,一層樓斷唔會住過世,千祈唔好一味貪平,第日想換樓,搵個客睇吓樓都冇就頭痕。