喺香港，邊個整蛋撻整到全港700萬市民無人不識？睇怕只有泰昌餅家嘅老闆歐陽天閏喇，呢位蛋撻界「撻神」，早前就應渣打銀行邀請，為四十幾位優先理財客戶度身開班授徒，教整蛋撻，結果大人細路都興高采烈，渣打用到撻神呢招冧客果然使得。食髓知味，噚日同傳媒午宴，渣打請歐陽老闆再斬四両，教該行高層同老記整撻。
唔整唔知，渣打香港區個人銀行阿頭洪丕正，一年煮唔到五餐飯，誓估唔到Ben哥嘅作品，獲「撻神」選為全場至正，令一眾女士汗顏。
講番歐陽老闆，呢位因香港最後一督彭定康，一句「HongKong'smostfavouriteeggtarts」而飲譽全城嘅撻神，與遠在英倫嘅肥彭仍然老友鬼鬼，佢話雙方一直有寄卡問好，聖誕節亦收到肥彭親筆賀卡。
[email protected]