花旗銀行再度擴充網絡,噚日一口氣喺太古城同馬鞍山開咗兩間新店,令香港分行數目增至28間。呢間美資銀行亦入鄉隨俗,搵隊醒獅打鑼打鼓。負責點睛嘅花旗香港首席營運總監盧韋柏(圖)話,05年底有個統計,香港嘅百萬富翁有四分一住喺東區同沙田區,分別佔4.6萬人同2.4萬人,所以呢兩區好多私人理財嘅商機。佢又漏口風話,下間分行或者喺將軍澳,事關嗰度有錢人都唔少。
盧生又話,舊年花旗生意好,淨係證券收入都升4成,估計今年亦有雙位數增長,當然要獎勵吓勤力嘅員工,今年平均加薪應該高過舊年,仲會高過市場一般嘅3至4%,認真可喜可賀!
梁鑑章攝
[email protected]