好多上市公司畀董事嘅人工、袍金，好多時大家睇完都會諗：「值唔值呀？」咁當公司唔係好好景嗰陣，有良心嘅管理層都願意共度時艱，好似先排同partner8號仔（其實應該係主席李家二少楷楷一個人）搞到唔係好開心嘅網通集團，旗下嘅中國網通（906），噚日就做咗個「好榜樣」！
佢哋噚日出咗通告，話以張春江為首嘅執行董事們同埋幾個非執董，經已自願放棄舊年嘅董事袍金，通告解釋話：「董事會認為董事袍金應與董事所承擔的工作量相掛鈎，因此，向董事發放基本袍金及就其每次出席董事會會議發放額外酬金為合理安排。」
咁網通董事長張春江班友仔係咪咁偉大？先睇睇佢哋實收幾銀，每年袍金每位原本係25萬銀，後尾減到20萬，但每出席一次董事會議，會另有1萬蚊額外酬金。
請諗個好啲理由
而年報就顯示，佢哋人工唔係好貴，但就勝在有房屋同埋其他津貼，淨係春江仔一件都有百幾萬，而再睇睇佢幾個對家，除咗中移動，另外兩間電訊公司嘅執董都冇收袍金……所以，你話佢哋到底係咪見公司上客唔多掂而咁「偉大」幫公司慳錢呢？唔知幾個對家又會唔會效法呢？
之不過咁，下次再有呢啲表揚自己減人工咁高尚情操嘅通告，網通不妨諗過一個好啲嘅理由！大大隻字寫住袍金應同工作量掛鈎，似乎寸番班董事上年冇嘢做。
[email protected]