邵氏製作總監黃家禧個仔黃承德結婚，前晚喺尖沙嘴新世界萬麗酒店筵開39席宴客，原來黃家禧同方逸華係表姊弟，方小姐前晚一早到場放低禮金，就趕去亞洲國際博覽館欣賞國際古典組合ILDIVO演唱會。其他到賀嘅賓客包括萬梓良、劉家輝、姜大偉、陳欣健、曹眾同應屆港姐冠軍陳茵媺等。黃家禧仲話：「方小姐睇住我結婚，睇住我個仔結婚㗎。」
想簽約無綫
至於陳茵媺，黃家禧話：「我同佢父母係好朋友，細個已經識得，我見佢參選港姐先發現佢入行。」陳茵媺話佢同黃家係世交，同新郎自小認識，咁即係陳茵媺同方小姐親戚相熟，唔知佢選港姐時有冇多少關照呢？黃家禧就話係睇港姐先知世姪女去咗選美。
問陳茵媺有冇諗過幾時結婚，佢話：「遲啲先，要timing嘛，打穩事業基礎先啦。」卸任後會唔會留喺無綫發展？陳茵媺話：「睇公司安排，各方面都想試吓。」
另外，同場嘅劉家輝話早排同陳豪拍內地電影《戚將軍》嘅騎馬戲時，不慎俾馬蹄踢傷左手手踭，搞到佢以後見到馬都怕怕。
