韋斯咸𠵱家喺英超聯排尾3，球會為咗唔想降班，之前已經簽入唔少新兵好似基舒、廸雲樸同尼爾等好手救亡。日前佢哋又喺西甲西維爾借得前鋒基柏加盟，諗住加強攻力；不過計埋先前簽入嘅般莫廸，韋斯咸𠵱家陣內有成8個前鋒咁多，領隊古比士利用唔用得晒呀？
新借將基柏上位有難度
基柏未加盟韋斯咸之前，聽講查爾頓、曼城同愛華頓都想打佢主意，今次基柏選擇咗「鎚仔幫」，應該都係昅中佢哋有條大水喉射住。如果基柏有水準表現，季尾佢除咗有機會獲長約外，到時周薪都肯定高過其他球會嘅開價。
不過𠵱家韋斯咸已經有希活、卡頓高爾、森莫亞、泰維斯、舒寧咸、般莫廸同養緊傷嘅艾殊頓共7個前鋒，加埋基柏自己就足足8個咁多，搵機會出場難度都大啲。我求大俠就有一度唔明，韋斯咸本身防守仲差，唔買幾個後衞反而掃前鋒，早排又傳佢哋曾向米杜士堡嘅維度卡問價，真係要咁多射手把鬼咩？
嗰邊榜尾嘅屈福特為護級又係發晒茅，領隊保夫萊特話喺1月份已經搵咗至少25個球員一齊試腳，南美兵同非洲仔又有啲咁，希望最後有幾個幫到佢哋啦。
「韋斯咸有班主上任大把錢，不過使錢買人都要明智啲先得㗎，如果個前鋒一場波冇波入，又要等派籌唔知幾時再有機會上陣，到時狀態咪仲差。」