大市急升400多點後，回一回，好正常，恒指曾下跌183點，收市只跌2點，高位承接力仍經得起考驗，後市可繼續看好。
華基光電（155）主打的太陽能發電業務，又有新發展，向內地上市公司合營提供生產設備及包銷產品，講緊嘅生意額又係超過10億元。
轉型至研發光電薄膜技術的華基，業務發展主要分3方面，分別係承建光電薄膜生產設備、分銷光電薄膜產品，以及生產製造非晶硅產品所需的SNO2玻璃。
上個月，華基宣布一單好令人哄動嘅突破發展，就係同無錫廠商源暢高科技集團合作，為其承建共31條年產量5至7.5兆瓦（MW）光電薄膜的生產線，生產非晶硅太陽能電池，項目規模為4.8億美元（約37億港元），全面投產後，每年產值達3億美元（約23億港元），所有產品經華基檢測及分銷，華基的太陽能技術亦正式進入實際商業運作。
最近宣布單新deal，係內地上市公司江西贛能股份（深000899）與華基同系公司組合營（分佔75%及25%權益），建設「贛能光伏產業園」，從事非晶硅光電薄膜電池的生產和銷售，由華基提供及安裝生產線，總投資約12億元，全部建成投產後，年總產能可達50MW，全部產品由華基包銷，由於市場需求大，合營公司在5年內可回本。
盈利可幾何級上升
兩單大deal，講緊嘅生產線，總值已接近50億元，華基賺幾多，肯定唔會係小數。另外，以後每年生產的產品，講緊總值又成30億元，華基包銷晒，又會賺幾多？就算賺10%，都已經係3億元，賺20%就6億元，條數好襟計。另外，華基日後應該仲會有deal，盈利可幾何級數咁上升。
華基噚日一支大陽燭抽上去，成交大增到近7000萬股，上月底急升（股價曾高見1.10元）後嘅調整應已完成，MACD出現「雙牛」入貨訊號，短線上升目標係0.90元，中線可重遊1.10元舊地。
郭兆誠