「沙維治踢法凶狠，同佢過招嘅球員無不嗤之以鼻，惟我求大俠睇見佢觸傷後好似畀蚊針咗一吓嘅輕鬆面容，對佢有啲改觀㖭！」
又一件！布力般流浪喺周二英超賽事，作客榜尾屈福特意外輸1:2之餘，中場悍將沙維治下半場與對方球員相撞，事後證實右腳骨折，提早收「咧」；佢係繼右閘尼爾轉投韋斯咸、奧查上仗斷腳收「咧」後，「暴力般」一周內失去嘅第3位中後場球員，領隊曉士呢劑都夠杰囉！
「玻璃腳」鄧尼頂替盞搞
「暴力般」周二之戰臨場起票，最後輸波累唔少捧場客，而「鐵漢」沙維治更喺下半場與對方塞拉利昂硬漢賓古拉相撞後倒地。當時，人人以為沙維治傷勢唔會嚴重，因呢位隊長不單止面上全無痛苦表情，神情冷靜，並耐心告訴軍醫邊度受傷。
雖然「暴力般」領隊曉士剛從利物浦購入可司職後場多個位置嘅禾諾克，但尼爾他投以及荷蘭中堅奧查提早收「咧」，沙維治又打柴令球隊雪上加霜；球員時代以硬淨出名嘅曉士未有批評賓古拉。他說：「呢個消息（沙維治斷腳）簡直係噩耗，但我認為兩人爭波碰撞係純粹意外。」
由於「暴力般」須兼顧歐協盃戰線，中場中人手的確緊張，除杜基外，可頂替沙維治就要數剛加盟嘅「玻璃腳傳人」鄧尼，若果後者一吓唔覺意又傷，呢隊波真你搵你教囉！