拒絕「集體回憶」 - 左丁山

拒絕「集體回憶」 - 左丁山

忽然接到鄭大班來信,信寫得好有感情,令人感動,於是打電話畀鄭大班:「封信寫得非常好喎,邊個執筆㗎?」鄭大班大怒:「我寫嘅。」咁就真係叻仔,勿謂左丁山有小人之心,政治人物寫家書,有邊位冇人在後做「槍手」㗎,美國啲政壇「槍手」唔知幾吃香呀。
鄭大班本來訂咗酒店(二十年前擺酒地方)請番一啲二十年前出席婚宴嘅老友來一次集體回憶,畀太太勞錦嫦一個驚喜。點知有人收到帖,竟向《蘋果》爆料,於是在李八方版預先講晒,鄭太睇完,當然冇晒驚喜啦,於是大班立即取消懷舊宴會,左丁山失咗一餐晚宴㖭。鄭大班封信話:「結婚二十周年紀念,本想搞搞新意思,邀請當年出席我倆婚禮的親朋戚友原班人馬及新知友好重回當日婚禮現場,一同集體回憶,好給我的太太Irene一個驚喜。
「可惜不知哪個有心人,把消息泄漏了給傳媒,立即成為花邊新聞,令日期曝光,不但再無驚喜,且會給應邀出席的好友帶來不便。所以,我決定把這個集體回憶SurpriseParty取消,在紀念日當天只二人世界慶祝。」(其餘感情流露之言,不便覆述)。
左丁山當日本想犧牲跑馬時間親臨祝賀(即係極度、非常畀面),點知冇咗餐食,謹借篇幅一角,向AlbertandIrene致以無限祝福,賀佢兩位白髮齊眉。
講起「集體回憶」,此乃近來流行名詞,左丁山素來對「集體」兩字,好唔舒服,怕晒「集體計劃」、「集體農場」呢類名詞也。果然,對文化學素有研究嘅陳雲(筆名)在《信報》發表文章之時,提及「集體回憶」(CollectiveMemory)有共產主義傾向,應該改用「共同回憶」(SharedMemory)一詞。係嘞,「集體回憶」令人回憶起集體批鬥,憶苦思甜,一萬人齊集,大罵農村地主之事,令人不快,香港幸好冇經歷過呢類瘋狂事,不必講甚麼「集體回憶」啦!「共同回憶」就帶有溫馨感覺,例如約女朋友喺「五支旗桿」等候,不見不散!各位傳媒朋友,以後請用「共同回憶」一詞,拒絕「集體回憶」。