一提起萬事得MX-5，儘管外形有多討好、價錢有幾實惠，總令我這些崇尚簡單操控、只得自動波牌的車迷卻步，皆因香港代理只引入手波操控的MX-5，要型要威唔該起碼有個棍波牌！遇着扭傷腳、雞眼發作，Sorry，請搭的士。幸好最近有車行返了款6前速自動波版MX-5，駕駛操作更為簡便，連出名「吱吱咋咋」嘅靚Model見到都話，真係單腳就揸到喎！
記者：陸伊琳
攝影：陳偉強
模特兒：Dicky
一手一腳走天涯
左腳拗柴、自動波牌與MX-5無緣？這部6前速自動波水貨版MX-5就打破這悶局，要做MX-5Fans不再是棍波友獨享！毋須再一味吊極力子同密密轉波，單靠右腳足以走天涯，方便到極！MX-5型就型喇，但你或許會質疑自動波車將失去揸跑車的樂趣，其實這車波箱兼備+/-波裝置，屬半自動波設計，升波降波自己話晒事，低轉低扭都可自我掌握，輕鬆駕駛之餘亦可帶來像手波車的玩樂趣味。
底盤紮實易過彎
第一代MX-5引擎只有1.6公升，配用傳統的4前速自動波箱，來到今時今日第三代的MX-5，已改為選用一台2.0公升MZR引擎，內附S-VT構造，每段加速表現也很平均，高轉數的性能演繹實在比第一代MX-5出色許多。新一代的MX-5另一優點就是底盤設計穩紮，操控穩定及易於掌握，轉彎時尤見其優點。不過略嫌這部開篷軟頂不及硬頂般方便，開關篷全靠人手操作，略嫌麻煩，直接減低開篷意欲，亦不及硬頂那種豪華貴氣感覺，不過全黑車身襯番軟篷，合上頂蓋仍然威猛無倫。喜愛硬頂純屬記者個人喜好。
陳豪揸咗舊款10年
好多MX-5Fans都不會經常換車，一揸起碼10年以上，如陳豪就是好例子；因為MX-5車系外表設計充滿線條美，款式襟興大路，新一代的MX-5更加入不少運動感，如肌肉型的拋沙板設計、圓潤的線條、雙出式尾喉等，勁有跑車Feel，車價二十多萬，算是一部經濟小跑車。
抵讚：
揸跑車唔係事必要棍波先叫快，今日呢架自動波版MX-5一樣叫人驚喜，自動波牌又多一個選擇。
要彈：
車身低座位低，最失敗係不能調校座位高度，細粒人士肯定坐到「凹」咗落去，揸得辛苦。
萬事得MX-5Roadster自動波規格
引擎：1,998c.c.直四DOHC
馬力：166ps/6,700rpm
扭力：19.3kgm/5,000rpm
傳動：6前速+/-自動波，後驅
售價：$239,000起
查詢：偉昌汽車（23030328）