香港人對日食要求越來越高，曾聽過有人這樣落Order：「我要三文魚番茄芝麻卷，不過唔要番茄要火腿，唔要芝麻要蟹子，同埋走沙律汁吖！」嘩，乜咁腌尖㗎！想食百分百合心水壽司唔一定要咁麻煩，銅鑼灣浪速壽司新推自由箱押壽司，無論材料、配料、醬汁到調味料都可以自己揀，可以組合過百種變化，以後落單唔使煩啦！
記者：林思樂
攝影：陳偉強
Model：Regine
遊戲開始
請在A、B、C、D4個項目分別選擇一種材料。
$25/2件（同款）
A 配料
B 醬汁
C 調味料
D 主食材
配搭小貼士
．帶子的鮮味好易被掩蓋，建議最好配淡味醬汁。
．牛油果醬味道較討好，與好多材料都好夾。
．沙律汁最百搭，夾任何材料都一定無死。
大阪壽司米甜夾酸
浪速向來主打大阪壽司，大阪現時流行有箱押壽司、魚裹壽司及蒸壽司等；與手握壽司明顯不同，製作過程繁複，變化亦多，好多款式都是香港前所未有，負責人蔣生話：「我們從大阪吸取了好多新款式，多到一次過推唔晒，要分段出，所以我們差不多每個星期都有新款。」浪速的材料大部份由日本新鮮運到，對壽司米更零舍講究：「大阪壽司米的飯油香，不會黐埋一嚿，而且經過長時間發酵，味道比一般米甜和酸。我們特別選用日本秋田縣的秋田米，香港的日本超級市場賣成$360/5kg，價錢是普通米的10倍。」
百搭食材任撈
剛推出的自由箱押壽司可說是全港首創，由材料、配料、醬汁到調味都可以由客人自己選擇，配搭出自家壽司，選單上的材料由師傅揀過度過，全部都好百搭，點配搭都唔會好難食。因此客人可以放心嘗試，像玩遊戲做實驗一樣，說不定會大驚喜，創出絕世好壽司！
其他新款特色壽司
生熟和牛軍艦 $30/2件
一件壽司兩種滋味，選用澳洲M5級和牛，一半以牛油煎熟，一半撈麻油生食，入口兩種味道截然不同，但味道同樣出色。
火炙安囗魚肝 $35/2件
安囗魚是日本特產，魚肝特別肥美。師傅以酸汁醃煮後加上特製醬汁，再用火槍燒，甜甜哋的醬汁配合鮮味十足的魚肝，非常惹味。
頂級法國鵝肝壽司系列
原價$160/3件 特價$80/3件
選用法國靚鵝肝，份量剛剛好，不但沒有掩蓋配料味道，更會融在配料之中，配合秘製醬汁，味道非常豐富，簡直是頂級享受！
師傅推介
駐場日本師傅江浦一宏在大阪做壽司已有20年經驗，對大阪壽司瞭如指掌，佢就組合了以下兩款：
鰻魚＋鵪鶉蛋＋鰻魚醬＋黑芝麻
浪速半生海老＋番茄＋沙律汁＋白芝麻
問師傅點解會咁配搭，原來純粹是個人喜好。似乎佢嘅配搭都幾保守，鰻魚配鰻魚醬點會唔好食，蝦配味道清淡的番茄和沙律汁實無死，師傅對材料配搭始終有份執着，而他特別推介鵪鶉蛋，煎得好滑，蛋汁與食物融在一起，味道好奇妙。芝麻好脆，配合煙韌壽司飯食落有點像芝麻糖，但又不甜膩。
食客心水配搭
黃生 推介：三文魚＋鵪鶉蛋＋沙律汁＋紫菜粉
盧小姐 推介：鴨胸＋蘆笋＋紫菜粉（唔要醬汁）
蔡生 推介：鰻魚＋火炙芝士＋芝麻汁＋紫菜粉
Rachel 推介：鴨胸肉＋蘆笋＋牛油果醬＋紫菜粉
羅小姐 推介：三文魚＋忌廉芝士＋沙律汁＋紫菜粉
陸小姐 推介：碎和牛＋番茄＋鰻魚醬＋白芝麻
睇路搵食
浪速壽司（28907729）
地址：銅鑼灣渣甸街50號渣甸中心地下B、C及D舖
營業時間：星期日至四12:00nn-12:00mn
星期五、六及假期前夕12:00nn-1:00am
座位：約50個
交通：銅鑼灣地鐵站F出口，往左行至渣甸街轉右直行到第2個街口
好着數：每日3:00pm-7:00pm及10:30pm至關門，迴轉帶上的壽司一律$9/碟，有幾十種款式任揀。
