紐約市市長彭博早前提到，紐約國際金融中心地位正受倫敦同香港挑戰，搞到香港金融界飄飄然。不過，新任香港美商會主席祈裕庭（GaryL.Clinton）就唔多認同，佢噚日喺記者會上話，香港同紐約唔存在競爭，只係香港為中國企業提供資本嘅角色正不斷增強，為市場提供更多機會。
以股票市值計又真係蚊髀同牛髀，香港去年底只不過1.715萬億美元，美國有15.4212萬億美元喎。不過，Gary話中國金融機構最近獲准喺香港發行人民幣債券，加上更多內地企業透過本港集資，為本地金融市場提供更多商機，而佢喺任內將同港府進一步合作，向美國商界推銷香港，擴大本港國際金融服務基礎，亦致力吸引其他國際服務供應商來港，例如對沖基金、私募基金、資產管理公司等。
外資來港 有出有入
Gary提到部份商會會員已將區域總部遷移去上海，或因本港營商成本高，而將後勤工序遷往珠三角地區；不過，由於亞洲區商機增加，吸引更多外資入嚟，香港成為唔少外資企業選擇設點嘅城市之一。
[email protected]