勁！孫柏文今次真係要甘拜下風。噚日，和黃（013）旗下嘅百佳超級市場「斷正」，被人捉到「油魚RuvettusPretiosus」當「鱈魚Cod」賣。食過油魚嘅百佳客戶，有啲仲出現「屙油」情況，令全城一面倒圍攻百佳。
不過，噚晚百佳舉行記者招待會，24小時新聞台全程直播，孫柏文當然開電視機睇。睇完我都要話百佳勁！首先，百佳完全唔否認「油魚」當「鱈魚」賣，誠實程度已經可嘉。可能因百佳知道冇可能否認，又冇可能認公司運作混亂到不知情，所以就要出孫柏文稱為「HongKongpeopledunknowEnglish」嘅高層次辯護法。
噚晚呢種辯護法咁成功，最緊要係因百佳搵咗個鬼佬返嚟，理直氣壯咁用英文話：「因為點樣界定define乜嘢係『鱈魚』根本冇乜準則，所以油魚絕對可以當『鱈魚』賣！」如果以上嘅係上聯，呢個「百佳鬼佬」冇講嘅下聯就係：「即係話，如果連我呢個母語係英文嘅鬼佬都覺得『油魚』等同『鱈魚』，你哋呢班chinks又點可以話有分別！」
雖然好牽強，不過我絕對覺得可以接受。如果大家覺得好離譜，孫柏文今日為大家提供一個更「勁」嘅辯護法。1996年花旗國，共和、民主兩大黨候選人紛紛為大選作準備。大家都知道，花旗國兩大黨為求可以將候選人嘅理念同政綱宣揚出去，都需要好多錢，所以每個候選人都會積極籌錢。不過，大選過後，有人發現當年克林頓Clinton同戈爾Gore嘅競選工程，曾經舉行過違反競選條例嘅籌款活動。
喺花旗國，任何競選工程撞到呢啲醜聞嘅「指定動作」，都會交「負責人」出來畀傳媒同輿論祭旗。點知，翻查競選工程會議記錄，原來當時批准舉行嗰次籌款活動嘅會議中，最高負責人係副總統戈爾，戈爾嘅情況有如噚日嘅百佳一樣「斷正」。不過當時，副總統戈爾話：「因為會議當日，會議室內有免費檸檬冰茶，而我又飲咗好多。會議決定嗰次籌款活動嘅一刻，我啱啱去咗洗手間屙尿，所以冇份批准舉行嗰次籌款。」
篤爆牛仔總統出口術
呢個「屙尿」辯護法一出街，即刻被各大傳媒稱為「冰茶IceTea」辯護法，大家一樣覺得好牽強，不過戈爾最終都係冇事。所以大家千祈唔好覺得辯護「牽強」就唔會「甩身」。
講起「油」，呢幾日油價都大翻生，全世界都話係因花旗國牛仔總統出口術，話要提高花旗國石油戰略儲備。今日，我要為大家篤爆呢個謬論。今時今日，花旗國石油戰略儲備有7億桶，牛仔總統話要提升8億桶，即係上升到15億桶。咁8億桶即係幾多？全球每日生產8000萬桶石油，8億桶即係全球10日嘅生產量，牛仔總統仲話要用好多年先至會到15億桶，所以油價升根本同牛仔總統無關。呢幾日油價大翻生嘅真正原因，係冬天卒之降臨北美同歐洲，如果溫度回暖，淡友又會再出擊，到時牛仔總統出乜嘢口術都無能力抵受拋空帶來嘅壓力。
金手指網誌： http://phatdat.blogspot.com