荃灣個細價盤引嚟大班久違嘅炒家入市，長實吹風吹咗好耐嘅東涌映灣園聽濤軒，都要拿拿臨趕開盤，呢輪每日一次軟銷，噚日終於有定價，而潛伏咗好耐嘅執董趙國雄亦出場，順理成章由佢公布定價，不過，臨場佢又扭扭擰擰，唔肯即時揭曉，話要同班代理玩遊戲，叫大家估吓先。
老細叫到，老土啲都要陪玩啦。一時間2800呀、3200呀都有人估，有啲人話係為意頭，估得高嘅就話係俾長實嘅3000蚊意向呎價誤導喎，查實仲要靠新盤開單養家嘅一眾代理，又有邊個會無畏無懼咁講個實情出嚟吖？不過，遊戲就係咁樣玩，老趙玩得興起畀埋貼士，4個數字都唔同、冇個8字云云……卒之都係美聯同盈富夠薑，估2930元，雖然同真實價2650元，相差280蚊，但已經最貼近喇。
[email protected]