相信唔少發夢中六合彩嘅人,都有諗過用啲獎金去買樓,網友ILK312就喺《香港討論區》叫網民投票,「假設中咗六合彩有500萬,你會畀幾多成首期買200萬嘅樓?」標題一出,即時吸引咗109個網民投票,當中超過86%選擇一筆過畀晒。
大部份贊成一筆過嘅人,都係唔想畀銀行賺息,好似新人話:「全數畀晒,唔使畀銀行賺息,其餘啲錢拎去投資。」victoriaahpak和應:「畀晒,當自己中咗300萬,以後餐飲餐食餐餐清,都不知幾爽,完全無生活壓力。」
I_am_Chris:「我都係咁話,cash300萬嘅話,唔太奢華,都好夠使㗎啦!」kckong:「當然一次過啦,畀銀行賺息咩!手頭仲有300萬,怕乜?」
除咗唔想畀銀行賺息,亦有網民擔心自己嘅理財能力,寧願畀晒無後顧之憂,ireneyip831話:「就算其餘300萬投資無咗/使咗/跌咗/畀人搶咗,仲有樓住嘛!」tingting83:「其他錢就算真係fing晒,到最尾起碼都有樓揸手先!」saga2099:「人有不測之風雲,仲有,有錢喺身會身痕!」
留作投資 回報更高
只有少數人會做按揭,原因係想留番啲錢做更高回報嘅投資。eddieywlee話:「五成到七成吧,一般五成到七成已經可以做到租畀人賺錢嘅目的;其他啲錢去做其他投資,會比較有彈性!」ribboy:「三成,剩低嗰啲用嚟投資,回報應高過P-2.8%=5.2%。」laishusum就話:「畀一半、供一半,反正𠵱家息口仲係平。」davis1130:「如果可以按九成都冇所謂,留多啲現金做其他投資都好。」
亦有啲比較冷門嘅選擇,一毫子都唔會揼落樓市,好似mike30話:「如果有500萬現金,我都會租樓住,將筆錢去投資,收息交租。」LMB:「我唔會畀錢去買樓,情願繼續炒炒炒,啲股仔升升升!」
相反,有網民會用晒所有錢去買樓,cinda:「三成首期夠買四層,三層炒、一層自用。」jjli131:「買兩間,各五成,一間炒、一間租出去。」
cicico就最激,用凸獎金去買樓,佢話:「俾我會買層700萬嘅樓,用400萬至500萬做首期!」
既然咁多發咗達嘅人願意揼大筆錢落樓市到,樓市前景斷估都唔太差啩!