開講有云：如果想人死，記得鼓勵佢搞傳媒！而ATV余老總統浩上星期亦講過，香港地做傳媒，係要富豪先做到！
咁香港傳媒難做就出晒名，但到底仲有冇吸引力呢？又係咪富豪先可以搞呢？
BNP法巴噚日出嘅研究報告咁講，基於邵蛇會離開TVB、九倉將K寶私有化、SCMP又會俾阿媽嘉里集團私有化、超級富豪大劉傾緊買《東方》呢啲「傳聞」，佢哋相信M&A（即係購併）將繼續係傳媒業大熱嘅話題，假如傳聞變真嘅話，就更會將傳媒嘅估值提升，因為呢啲傳媒𠵱家個市價係有34%折讓，而TVB更係佢哋嘅首選！都係嘅，數勻啲傳媒老闆，似乎只得99歲嘅邵sir最似唔想玩。
富豪借力擴勢
咁傳媒魅力到底何在？BNP話賺大錢一定冇份，但收入一定穩定，而買咗分分鐘又可以進軍祖國市場，響冇乜規管之下，又容易轉手，但更正係提供一個平台畀啲富豪發揮佢哋對公眾嘅影響力。
BNP法巴仲舉咗個例子──李家二少李察舊年買咗《信報》……唔知二少係上述邊個原因買《信報》？又或者純粹係「我鍾意」呢？
[email protected]