可能經歷咗幾次股災，交咗唔少學費，近年股民炒股技巧普遍提高，識得借市場氣氛炒作、炒新股，甚至炒影子股。
近排財爺唐英年家族隻美維（3313）招股，有好多散戶都買咗被戲稱「即沉板」嘅建滔積層板（1888），博炒影子概念，但效果就唔係咁好。
玩埋呢轉無嘢玩
喺《Yahoo!》討論區內，有網友以「積層板討論/打氣區」為題，呼籲大家吹吓水。網友cksbnr2004就話：「（積層板）9.3蚊時我就放啦，玩埋美維，無嘢玩，長線投資太多選擇。」
網友stan話：「料美維IPO反應可超額幾百倍，如建滔板升到9.5元都算唔錯嘅沽出價。」
睇嚟坐咗艇嘅建滔板死硬派jcyplam1就話：「1888由上市至今，期望越高，失望越大，但不要放棄，要信有前景！」
網友wahsiu90就走出嚟安撫坐緊艇嘅網民，佢話：「稍安無躁，呢隻係優質股，要有耐性同定力……」不過，佢就無話大家要等幾耐。
另一網友bluesky都叫fans唔好灰心，「既然我哋都喺度坐咗咁耐，點解唔守多10日（美維２月２日掛牌），睇吓影子股效應係點呢？相信呢個都係大戶入場嘅目的之一。只要大戶還在，我會死攬唔放，見低再入！」
genkivan就加多句：「點都等埋美維上市先走！」
查實建滔板究竟吸唔吸引？花旗日前出咗個報告，佢第一次寫呢間公司，就畀個「購入」評級，目標價仲要係全街最高嘅10.1元！又話呢個目標價，係用07年16倍預測市盈率計算出嚟，認為公司高回報同慷慨嘅派息政策，可以支持股價。
花旗估計，建滔板可以受惠於銅價下跌，令毛利率得以改善。仲話目前最大嘅風險，就係管理層對07年上半年嘅市場需求，持謹慎態度。
花旗力撐有玄機
齋睇報告，隻股又真係幾好喎──不過，花旗有一樣嘢無寫到，之咪係佢有份幫美維上市囉！