蘋果公司掌舵人喬布斯喺三藩市MacworldExpo揭開iPhone神秘面紗後，迅即成為城中熱話，有人擔心這部結合iPod、手機和互聯網連接器功能嘅iPhone，可能會分薄潮物iPod嘅市場。不過，喺《MSNBC》有文章指出，原來好多美國人都唔只擁有一件iPod產品。
JupiterResearch分析員MichaelGartenberg話：「iPod產品有唔同系列，每個系列都有佢嘅特色同特別用途，又有唔同大小、容量、顏色同價錢，設計根本就係要誘客按唔同需要，買起碼一部以上iPod機。」
不同場合 不同需要
呢個說法好似講得幾啱，難怪擁有幾部iPod嘅用家JeffBaker都話：「踩單車或者做運動時會用iPodnano聽歌，貪佢又細又輕；煮飯就要開30GB嘅iPod先至夠勁；架車就要擺定部80GB嘅iPodVideo嘞﹗」
《MSNBC》討論區中，nwmk直言有兩部iPod都仲嫌未夠，「第一部買嘅iPod主要用嚟聽歌，貪佢細部又易用；之後買咗部60GB嘅iPodVideo，用嚟睇戲、睇電視，出街、坐車、等人、搭長途飛機時都唔怕悶，又可以儲定啲相，隨時同朋友一齊睇，但容量就未必夠用，可能又要買多部iPod先得。」Sotti亦附和：「有幾多人會買多過一部CD播放機？但iPod產品就唔同，因為佢有唔同嘅功能、容量同體積，而且價錢越嚟越平，一般人都負擔得起。」
不過，網友TheJay就覺得唔值，「與其買幾部iPod，不如留番啲錢嚟交租、買嘢食咪仲好。所以我有一部iPodshuffle已經覺得好足夠。」
過去幾年，蘋果不斷推陳出新，先後有多個不同型號iPod產品登場，包括iPodmini、iPodnano、iPodVideo及去年10月推出的第二代iPodshuffle系列，各有賣點吸引客戶大破慳囊。自第一代iPod於2001年10月面世後，至今蘋果已售出超過8870萬部iPod。