買股唔同買棵菜，不過華華隔籬屋嘅師奶話，就算去街市買餸，都會揀個啱傾、信得過嘅檔口幫襯，有時貴少少都冇所謂。要成功建立品牌，當然唔係一朝一夕嘅事。
廠商會同品牌局早排再次搞「香港名牌選舉」，大家除咗可以喺工展會投票，大家仲可以上網揀心水佳麗。噚日頒獎，幸運兒有7個，包括Sinomax（按摩用品）、翡翠籐器、快譯通、草姬（醫藥）、Dr.Kong（健康鞋）等等。
冧莊多次嘅鱷魚恤、四洲（零食）、六福珠寶及金妹牌（火腿），就獲得神檯獎（香港卓越名牌）。最具潛質品牌由鋼之傑同盛威奪得，怕且好多人都未聽過呢兩個大名。最受網友歡迎嘅就係四洲。
網友最Buy大昌超市
至於同場加映「服務名牌選舉」，得獎嘅就有10個，分別係卓悅、大昌超市、美國冒險樂園、六福珠寶、高登眼鏡、Neway（唱K）、零食物語、實惠、鴻星酒家，以及太興燒味。藍十字保險同復康巴士，就獲得最具潛質服務嘅品牌。網友最Buy嘅就係大昌超市，真係民以食為天呀！
兩邊都攞獎嘅六福CEO黃偉常話，經常同班夥計講，做生意第二；友誼第一，有誠懇親切嘅服務態度，就可以突圍而出！
[email protected]